أصحابى حبّوا يفرحونى :)

إن الكلام يموت حين يقال :)

صور التخرج

مش عارفة البنى آدم كئيب بطبعه وبيحب يرّخم على نفسه حتى فى الأوقات الحلوة ولا إيه !!
إنك تنسى بهجة الصورة وفرحة اللى فيها 

وتفكر إن التجمع ده مش هيحصل تانى واللمة دى مش هتعيش معاهم تفاصيلها تانى !

وياترى الحياة هتبعتلك ناس زيهم بنفس روحهم وبهجتهم ولمّتهم تانى ولا لأ

بيقولوا " ماتحبش حد عشان ساعة الفراق ماتتعبش "

ياترى كان هيبقى أحسن لو ماعرفتهمش وما اتعلقتش بيهم !!

يمكن ده أكتر سؤال جه على بالى الفترة اللى فاتت دى .. من ساعة ما أدركت فعلياً إنهم خلاص هيتخّرجوا وكل واحد هيروح فى طريق 

الدفعة اللى دفعتى ومش دفعتى ..  

إنتو حلوين بدرجة تزّعل أوى بجد إنى ماعدتش هشوفكم :(

ربنا مايقطع لمّتهم ولا روحهم وتفاصيلهم الحلوة :)

للتوثيق

الأحد 29/3 كان يوم حلو جداااا 
تسجيل التفاصيل بكرة بقا :)

فى خلال فترة قصيرة سمعت وعيشت فعلا المعنى الحقيقى لـ "سرقة الفرحة "
يعنى إيه حد يجى فجأة كدا يسرق فرحتك بصاحبة عمرك أو ببنتك أو أعز الناس عندك 
المشكلة إنها بتبقى فرحة كبيرة , فرحة مش هتتكرر تانى أبداً 

إحساس وحش جداااا لأنك بدل ماتكون فرحان جداااااا فى الوقت ده زى ما المفروض يحصل وزى ماكنت بتحلم طول عمرك , بتكون متضايق وحزين على الفرحة اللى اتسرقت قدام عينيك وماقدرتش تعمل حاجة !! 

مش عارفة المفروض ازاى اتصالح مع حد سرق فرحتنا ! 
وإزاى أفرحله وهو عايش فى الفرحة اللى سرقها واستكترها على غيره !! 
وإزاى أصلاً أأتمنه على الفرحة دى !

يارب مانعيشهاش تانى

نعيش فى مجتمع ربما تفعل به الفتاة مالا تحب أو تريد 

نكايةً بهذا المجتمع الذى يفترض عدم أحقّيتها بذلك .. 

لتثبت له ولنفسها بأنها 

"حرة "

فرحين فى يوم واحد .. 

بصحبة مختلفة , بإحساس مختلف

 

اللهم اجعلنا عوناً لآبائنا لا حِملاً عليهم

 

وأنا صغيرة كانت ماما تقولى لو نضّفتى الأطباق اللى فى الحوض هتفضل تدعيلك لحد الصبح ^_^ .. 
وده طبعاً نقلاً عن كلام ستى :D
المهم إنى كنت مصدقة وكنت دايماً أنا اللى بنضّف الأطباق ... وأقعد أعّد فى الدعوات بقا :D

لحد ما بابا جه فى يوم وكان بيشرحلى إنجليزى , مالقاش شبه يوّصلى بيه معلومة إلا إنه يقولى 
- زى لما ماما تبقى عاوزاكى تنّضفى المطبخ تقوم تقولك الأطباق هتدعيلك كدا :P 
- فأنا اتصدمت بقا يومها : يعنى هى مابتدعليش بجد :O !! 
- فقام ضاحك :@
- ورحت يومها لماما قولتلها ينفع كدا تخدعينى وتقوليلى بتدعيلك وإنتى عاوزانى أنضف المطبخ وخلاص :@ ! 
-قامت ضاحكة هى كمان وقالتلى الإنجليزى بتاعكم ده هيضّيع كل اللى بعمله :D ! 

ومن يومها مش لاقية حاجة تقطع الشك باليقين وتقولى الأطباق اللى غسلتها دى كلها فضلت تدعيلى طول الليل ولا كانت بتروح عليها نومة ولا إيه :D !

أينعم ماما ماعدتش بتقولى كدا عشان أنضّف المطبخ بقا خلاص
بس أنا فضلت مصدقّة إن الأطباق بتدعيلى بجد لما بنضّفها ^_^ 

ولحد دلوقتى كل أما أدخل المطبخ وأغسل أى حاجة .. يصعب عليا الباقى وأحسهم زعلانين انى نضفت شوية وسبتهم وأتخيل بقا إنهم هيفضلوا زعلانين وشايلين منى لحد الصبح :D 
فأقوم مكملة بقا غسيل لكل اللى موجود . . وأضحك مع نفسى عادى :D 


ربنا يسامح ماما وستى الله يرحمها بقا 
هما السبب فى استغلال الأطباق ليا لحد دلوقتى :D

أول إحساس ..

دايماً الإحساس الأول بكل حاجة بيبقى مختلف 

أول نجاح تدرك معناه

أول كلمة بحبك تقولها أو تسمعها

أول كلمة بابا أو ماما من أول طفل يجيلك 

أول خطوة يخطيها ابنك/بنتك 

أول قراءة لرواية حلوة 
أول انبهار لما تشوف فيلم مختلف 

كل إحساس أول بتحس إن مافيش زيه فى الدنيا كلها

فرحة مابعدها فرحة أو يمكن حزن مابعده حزن 

زى أول فراق برده 

بتبقى حاسس إن الدنيا هتقف , وإنك مش هتعيش حياة عادية بعد كدا من كتر الوجع 

أو يمكن مابتبقاش متخيل إن حياتك ممكن تكمّل أصلا بعد الفراق 

إحساسك بالوجع نفسه بيبقى مبالغ فيه جداااااا 

بعد كدا كل حاجة بتبقى عادى 

مابتفرقش معاك أوى الحاجات دى 

يمكن بتفرح وتزعل برده بس مش بنفس الدرجة الأولى

إحساسك بالحاجة أول مرة بيهّون اللى بعدها 

ويمكن ده مطلوب فى الحزن أو الفراق .. 

لما بتبص على فترة حزنك على أول فراق فى حياتك , يمكن مابتصدقش اللى كنت عامله فى نفسك !! 

بغض النظر الشخص اللى فارقته ده يستحق أو مايستحقش ..

بس طريقة تعاملك مع الفراق ده كانت فيها مبالغة غريبة .. مبالغة يمكن عمرها ماهتحصل تانى مهما فارقت بعد كدا 

بتكتشف إنك كنت صغير أوى وساذج أوى أوى 

أو زى مابحب أسميها naive  

الحزن بيعلمك ماتتهّزش بسرعة بعد كدا مهما قابلت 

بيعلمك تنشف .. 

I used to be naive once !

الورق الملون

الورق الملون فى ذاته أصلا بهجة ^_________^
بحب جدااااااا اشتريه وبحب أكتب عليه وألزقه فى أوضتى واعمل بيه حاجات لأصحابى .. فعلا بهجة :) 

فى يوم  من الأيام اللى مش بعيدة , أوضتى كانت زى الصورة دى ..

  
بس على أحلى طبعاً:P 

وكان أى حد يدخلها .. لازم يلفت إنتباهه الورق و يقولى هو إيه اللى انتى ملزقاه على الحيطان ده !! 
ويمكن ده كان أكتر سبب بيخلينى أتضايق لو حد مالوش معّزة خاصة عندى إضطريت إنى أدخله أوضتى .. وقعد يبص فى الورق ويحاول يقرأ اللى فيه :@

من كتر ماكانت أوضتى مبهجة وكان الورق ده غالى عليا جداا بما يحمله من كلام وذكريات ومواقف مختلفة ,
كنت ضد إنهم يغيّروا دهانها مع باقى الشقة لأنى هضطر إنى أشيل كل ده .. بس للأسف شيلته فعلا وإلا كان زمان العمال تعاملوا معاه بطريقتهم :D 

بعد ما تم دهان الأوضة ماكانش ينفع ألزق الورق كله تانى ,, مش هيبقى فى نفس مكانه الأول ولا هيبقى نفس إحساسه الأولانى لما اتلزق ورقة ورا ورقة , وموقف ورا موقف :) 

وبالتالى كان القرار 
أوضة جديدة >> ورق جديد >> ذكريات وبهجة جديدة :)

على ما يبدو دمو خفيف
على ما يبدو شكلو ظريف
وجوَ لطيف وحكيو طريف
ومنو سخيف على ما يبدو

على ما يبدو طبعو كريم
وفكرو سليم وصوتو رخيم
ولون عيونو مابيخونو
واكتر ما عاد فينا نضيف

على ما يبدو هاوي غرام
وخايف يجرح قلبي حرام
انا ما وعدتو او بعدتو
ولا قلتلو الأمل ضعيف

https://soundcloud.com/jailan-lshafie/oilj80sbr2kx

PedAya

قبل إمتحان الأطفال الفينال السنة اللى فاتت حصلت ظروف خلّتنى أبدأ متأخر وأذاكرها فى اسبوعين بس 
فى الاسبوعين دول فكرّت أأجل فعلياً لأول مرة فى الكلية يجى 50 مرة .. مش عشان مش هلحق أخلص وإنما عشان ضغطى وصحتى 
المذكرات بشعة والكلام فيها بشع 
المشكلة الأكبر إن الكلام بسيييييييييييييط جداااااااااااااااا ومش مستاهل كل الكلكعة والتعقيد ده ! يبقى ليه كدا -_- 

فاكرة شكلى وأنا فاتحة مذكرة الكارديو , بعد ماذاكرت المواضيع المهمة وقلت أما اشوف الـ 3 صفح دول كدا قراية ماجتش عليهم يعنى .. أهو للعلم بالشىء حتى
وشى سخن ودماغى صدّع وبدأت أحسبن وفعلاً إتقفلت من المذاكرة وقلت مش مكملة ومش داخلة الامتحان .. كنت ساعتها لسة فى بداية اليوم أصلا ومش ناقصة تأخير !
قمت ساعتها جبت رواية أقراها يمكن أهدى ومزاجى يتحسن وأعرف أكمل
المشكلة إن أصل الحالة دى فضل على حاله ولازم ولابد أرجلعه :D .. وهى مذكرات الأطفال -_- 

الموضوع ده حصل مع معظم الشباتر فعلاً , وللأسف الكلام بسيط بجد والمذكرة ممكن اختصارها فى أقل من نصها لو اتعملت بشكل كويس وأكيد هتنجز جامد فى وقت المذاكرة .. 
وكان ده الهدف اللى خلانى ما أجلش وأكمل مذاكرة وأدخل الامتحان 
إنى لازم أخلص عشان أظبط المذكرات دى .. والدفعة اللى بعدنا ماتعيشش نفس المعاناة اللى احنا عيشناها دى 

كنت فكرت فى حاجة زى دى أيام الباطنة بسبب د/موافى .. 
لأنه أنقذنى فعلياً فى حاجات ماكنتش فتحتها خالص طول السنة ولولاه كنت دخلت من غيرها
وكتبت يومها  نوت عشان تبقى قدامى دايماُ وتفكّرنى بده 
(( أحسِن كما أحسن الله إليك )) 
بس بعد ماشفت الأطفال والمأساة بتاعتها .. قولت هى أولى :) 

يمكن دى تكون بداية التغيير وبداية لمعرفة إجابة السؤال اللى شاغلنى من فترة طويلة ولسة بدّور عليها 
(( أنا غيّرت إيه فى الدنيا ؟ )),, (( إيه الأثر اللى يثبت إنى إتوجدت فى الدنيا دى لو مت بكرة ! ))

ولحد ما أوصل للإجابة .. فيمكن ده اللى أقدر أعمله دلوقتى
PedAya  .. ويارب أكملها للنهاية :)

الأصل فى الأشياء نهايتها

الأصل مع أى بداية .. نهايتها
الأصل فى الحياة .. الموت 
الأصل فى الصداقة .. الفراق
الأصل فى الخطوبات .. الفركشة

ليه بقا بنتفاجىء أوى ونحزن أوى لما حاجة من دى تحصل !! 
لأن المنطق والعقل حاجة والمعايشة حاجة تانية

معقول حد مهما بلغ من الحكمة والعقل والمنطق يبقى داخل علاقة ومستعد لنهايتها ؟؟؟ 
دايماً المنطق والحقيقة بتبقى ظاهرة قدامنا طول ما احنا بعيد فعلياً عن العلاقة دى .. وبنبقى فاكرين إننا لو قربنا واتحطينا فى الموقف ده مش هنتأثر لو وصلنا للنهاية لأننا من الأول عارفين إن الأصل إنها هتنتهى 
بس مين فينا بيصدق فعلياً إنها ممكن تنتهى !!!
ومين مابيتأثرش ! 

بكرة بيخلص ها الكابوس
وبدل الشمس بتضوى شموس

اللهم لا تعلق قلوبنا بما ليس لنا

واجعل لنا فيمن نحب نصيب 

دى دعوة ملازمانى من كام يوم 

لأسباب كتير جدااااااااا

بس يمكن أول مرة أحس بمعناها اللى بجد النهاردة ! 

 

حققت إيه فى حياتك ؟

بتفضل تضحك على نفسك إنك لسة صغير وبكرة ياما هتعمل فى حياتك وياما هتوصل لحاجات كبيرة
وبتفضل مصدق جداا الكدبة دى 
لحد ماتلاقى ناس فى نفس سنك وتعرفهم معرفة شخصية وصلوا لمكانات كبيرة وحققوا إنجازات فى حياتهم برغم سنهم ((الصغير )) 
اللى بتضحك على نفسك بيه !!

المشكلة إنك دايماً باصص تحت رجلك , للحظة اللى انت فيها وبس ,, وبتحلم من غير تخطيط من غير تفاصيل .


إنت مش شايف نفسك بعد سنة , 5 سنين , 10 سنين , 20 سنة !!
أو مش عارف أصلا إنت عاوز إيه ونفسك تكون فين ! 

لو مافكرتش إنت عاوز تكون مكانتك إيه بعد 20 سنة من دلوقتى .. 

هتفضل محلك سر .

أنا إزاى بتفرج على الصور اللى كلها بهجة وبسمع سيرة الأراجوز فى نفس ذات اللحظة :D !! 

صور نيو إرا .. ضحكة وإبتسامة
إبتسامة من اللى بتوجع الوش من كتر ماهى بتستمر وقت طويل على وشك وبتزيد مع كل صورة ^_________^

I'm in great need of my friend ... my close friend ,

..... she would understand 

مرسال لحبيبتى

حَبِيبْتِي
..شَرْطَه مَايْلَه
..فَرَاغْ
وهَاكْتُبْ لِيهْ حُرُوفْ إِسْمِكْ؟
مَا هُو انْتِي فْ قَلْبِي سَاكْنَه الْقَلْب
عَارْفَه بْقِصِّتِي وْحَالِي
ومِينْ غِيرِكْ فِي قَلْبِي اكْتُبْ لُه مِرْسَالِي؟ 

وأَمَّا بَعْد ..

 
مَانِيشْ عَارِفْ جَوَابِي دا جَوَابِي الكَّامْ
مَا عُدتِشْ بَاحْسِب الصّفْحَاتْ
مَا عُدتِشْ بَاحْسِب الاّقْلاَمْ
مَا عُدتِشْ بَاحْسِب اللّي ضَاعْ مِن الأَحْلاَمْ
..كِفَايَه انِّي بَاحِبِّكْ بس
..وقَلْبِكْ لَوْ بِقَلْبِي حسّ
أَوْ شَافْ حَالُه فِي بْعَادِك!

لَصَلَّى لْرَبُّه واسْتَغْفَرْ لِذَنْبُه...وْصامْ
 

قُولِي لِي ازّايْ أَحِبِّكْ حُبّ يِرْضِيكِي؟
أَنَا تَايِهْ... وِنِفْسِي اوْصلْ أَرَاضِيكِي
دَا لَوْ كَان الْهَوَا بِالسُّهْد
..انَا سِيدُهْ
ولَوْ قُلْتِي انّ حُبِّكْ صُوم
..أَنَا عِيدُهْ
ولَوْ حُبِّك فِدَاهْ قَلْبِي
أَقَطَّعْ قَلْبِي مِيتْ مَرَّهْ
..وَاقَدِّمْ لِكْ عَنَاقِيدُهْ
!

وِبِتْقُولِي بَاحِبِّكْ لِيهْ؟
وهُوَّ الْقَلْب مِتْعَذِّبْ كِده بْإِيدُهْ؟

بَاحِبِّكْ... حَتَّى لَوْ بِاب الْقُبُول اتْسَدّ
وهَاتْخَيِّلْ صَدَى صُوتِي بِيَاخُدْ كِلْمِتِي وْيِرْجَعْ مَعَاه الرَّدّ
:

ولَوْ قُلْتِي لِي مِيتْ مَرَّهْ
.."أَنَا عُمْرِي مَا حَبِّيتْ حَدّ"
هَازيد الْكِلْمَه مِيتْ مَرَّهْ

دِي نُقْطِةْ مَيَّه مِ الْمَطَرَهْ إِذَا فَاضِتْ
..تِهِدّ السَّدّ
وحَتَّى لَوْ فَارِقْتِينِي
..هَاحِبِّكْ فِي الْفُرَاقْ بَرْضُهْ
هَوَاكِي فْ قَلْبِي لَوْ شُفْتِيهْ
..نَوَافْلُه وْسُنِّتُه وْفَرْضُهْ
وحُبِّكْ أَرْضُه
لَوْ تِنْسِيهْ... هَيِنْسَى ازّايْ حَنِينْ أَرْضُهْ؟
 

ويَامَا فْ نِفْسِي
يَامَا فْ نِفْسِي
تِيجِي لْقَلْبِي وِتْحِنِّي
..ولاَزِمْ تِعْرَفِي إِنِّي
..لاَ انَا عَفْرِيتْ وَلاَ جِنِّي
..بَاحِبِّكْ... بَسّ إِيدِي اقْصَرْ كِتِيرْ مِنِّي
 

فَمِشْ هَاْقدَرْ
أَجِيبْ لِكْ مِ الدَّهَبْ كَفَّهْ
وَاجِيبْ لِكْ مِ اليَاقُوتْ كَفَّهْ
ومِشْ هَاْقدَرْ
أِجِيب الْوَالِي فِي الزَّفَّهْ
ومِشْ هَاْقدَرْ
أَجِيبْ لِكْ بِيتْ
يِمُوت الْقَطْر لَوْ لَفّ فْ حِمَاه لَفَّهْ
 

كِفَايَه انِّي بَاحِبِّكْ مُوتْ
وحُبّ النَّاسْ نَدَامَه وْعَارْ
وحُبِّي عَكْسهُمْ عِفَّهْ

ولَوْ تِرْضِي فَعَنْدِي شْرُوطْ
أَنَا طَبْعاً بَاحِبِّكْ مُوتْ
ولَكِنْ بَرْضُه لِيَّه شْرُوطْ
أَنَا عَايْزِكْ تِكُونِي فِي الْوَرِيدْ دَمُّهْ
وِتِبْقِي فْ عَقْلِي انَا هَمُّهْ
وِتِبْقِي وَرْد جُوَّا الْقَلْب
غِيرِي يْشُوفُه يِتْحَسَّرْ... وَلاَ يْشِمُّهْ
وعايزك تفهميني لو كلامي طلّ من رمشي
وعَايِزْ رِمْشِك الْجَارِحْ
صِرَاطْ يِجْرَحْ فُؤَادْ غِيرِي مَايِرْحَمْشِي
 

وَانَااجِيلِك
أَعَدِّي فُوقْ صِرَاطْ رِمْشِكْ... وَلاَ اخَافْشِي
وحَتَّى لَوْ وِقِعْت فْ يُومْ مِن الْخَضَّهْ
أَقَعْ فِي عْينِيكِي وَاتْوَضَّا
وَاصَلِّي رَكْعِتِينْ لله
وَابُوسْ نِنّ الْعِينِينْ
..وَامْشِي
 

لاَ انَا طَمَّاعْ
وَلاَ فْ طَبْعِي الأَنَانِيَّهْ
بَاحِبِّكْ
وانْتِي انَا طَبْعاً
ومَا اسْمَحْشِي لِحَدّ يْكُونْ شِرِيكْ فِيَّهْ

وقَبْل مَا يِخْلَص الْمِرْسَالْ
:بَاعِتْ لِكْ مِنْ عِينَيَّه سُؤَالْ
وهُوَّ الْحُبّ كَانْ عِيبَهْ؟
ولَوْ مَرَّهْ حِلِمْت بْضِحْكِتِكْ فِي النُّومْ
عَلَيَّهْ تِتْحَسَبْ غِيبَهْ؟
 

وفِي الآَخِرْ
بَاعِتْ لِكْ وَيَّا مِرْسَالِي الْجِدِيدْ أَحْلاَمْ
بَلاَشْ تِرْمِيهَا كَالْعَادَه مِنَ اعْلَى الْبُرْجْ
وِخَايِفْ يِبْقَى مِرْسَالِي نِهَايْتُهْ زَيّ أَجْدَادُهْ
!فِي قَلْب الدُّرْجْ

جَنَايِنْ قَلْبِي رَاحْ تِفْضَلْ ولَوْ طَال الْبِعَادْ فَاتْحَهْ
بَاحِبـِّــكْ
قُلْتهَا بِالْكَسْرَهْ
!!!نِفْسِي اسْمَعْهَا بِالْفَتْحَهْ

الليل - نوستالجيا - نيو إيرا 

3 كلمات بيعبّروا عن الأسبوع

جوازة ولا .. !

من كتر الحاجات المستفزة اللى بتحصل فى فترة الاتفاقات على الجواز .. كوّنت شوية قناعات :

أولا :أهل البنت ليهم حق يتشّرطوا وأبوها يحط رجل على رجل ويتأمر بمزاجه ,, أيوه بنته دى مش زى أى حد وهيبقى بيتكرم وبيتعّطف لو قِبل بأى عريس جالها مهما كانت مواصفاته , ولازم العريس ده يبقى عارف وواثق من كدا .

ثانياً : البنت عند أهلها أميرة مهما كان مستواها المادى أو الإجتماعى , ولازم مايجوّزوهاش إلا اللى هيتوّجها ملكة ,, ولو هما مش بيتعاملوا على هذا الأساس يبقى ظلموا بنتهم ومايبقوش يزعلوا لو جوزها ظلمها أو عاملها وحش بعد كدا .

ثالثاً : لو إتفتح الكلام فى الماديات بشكل أو بآخر (بعد ما الطرفين اقتنعوا ببعض -بما فيهم الأهل طبعاً ) .. وإختلفوا الإختلاف اللى بيؤدى إلى فصال يبقى بناقصها الجوازة دى ,, غالباً فيه حد معفن والاختيار كان غلط ,, ولو الإتنين معفنين .. يبقى ألف مبروك

رابعاً :القايمة والمؤخر والمقدم وكووول ده بغض النظر عن رأيى فى اللى بيحصل وسواء مع أو ضد - خاصةً موضوع القايمة يعنى ,,, دى حاجات بتبقى زى عُرف أو يمكن تقاليد زى مابيقولوا (سِلو بلدهم كدا ) ,, وماشى مالهاش أى ستين لزمة ومش بتقيس حاجة والكلام ده كله ,, بس المفروض اللى داخل داخل بيتفق على جواز مش طلاق .. وبالتالى عيب أوى لما يقعد يفاصل فيها أو يعمل مشكلة ويعتبرها إهانه لذاته وذكرياته !!
يا إما حضرتك عارف إنك داخل بيت محترم وإن إختيارك محترم وإنهم ناس بيعرفوا الأصول , وعارف برده إن حضرتك هتصون البيت اللى دخلته وهتراعى ربنا مع بنتهم وبالتالى الماديات مهما وصلت قيمتها عمرها ماهتكون الفيصل فى حل خلاف بينكم مهما وصلت مراحله .. , 
إو إنك داخل الموضوع بمبدأ ( نجرب مش هنخسر حاجة ) وأهو لو إكتشفت إنك ماكنتش مستعد للإرتباط أو إتسرعت , يبقى أديك مأمن نفسك !!!

وبرده لو حصل إختلاف على قايمة أو مؤخر أياً كان قيمتهم (مادام عُرف البلد إنهم يتكتبوا ) يبقى بناقصها الجوازة دى
حضرتك داخل جوازة مش بتستعد للطلاق !

خامساً :الجواز ارتباط بين أسرتين , وبالتالى مع إحترامنا للشباب ماينفعش تقول لأهلك أهى هى دى ولو فيها وفيها , ولا البنت تقول لأهلها هو ده ولو مش عاجبكم مش مهم أنا اللى هتجوّزه ((بمختلف التحوير فى الكلام )) .. على افتراض إن الاتنين أسوياء طبعاً ورفضهم مش رخامة وخلاص يعنى
حضرتَك وحضرتِك ليكم حق تختاروا شريك حياتكم ,, وبرده الأهل من حقهم يختاروا شريك حياتهم ,, الزوج والزوجة مش بيعيشوا لواحدهم عشان مايحترموش رأي أهلهم فى اختيارهم .. إلا لو كانوا ناويين يعيشوا هما الاتنين فى المريخ بقا من الأول وينسوا إن كان ليهم أهل وبيت وناس بيهتموا بيهم وبراحتهم !

سادساً :مش معنى إن أهلكم غلطوا فى حاجة أو اتصرفوا تصرف مش كويس مع عريسك/عروستك إنكم تقفوا قصادهم وتردّوا عليهم أو تتحدوهم قدام الطرف التانى على اعتبار (وإيه يعنى مهو مننا وعلينا ) ! يمكن تكونوا فعلا عقليتكم وتفكيركم سابق أهاليكم وبتفكروا صح وهما غلطانين .. بس هما اللى عملوكم من الأساس , هما السبب فى إنك أحسن منهم .. فماتجيش تتنطط عليهم دلوقتى وتعرّفهم أد إيه هما مش أد عقل سيادتك ولا عارفين يتصرفوا صح زى حضرتك !! ولأ (هو مش من العيلة لو ده مبررك عشان تهاجمى أهلك قدامه )
كرامتك من كرامة أهلك , ولو إنتى أهانتيهم مرة قدام زوجك المستقبلى أو العكس ..إستحالة إحترامهم وتقديرهم هيفضل عنده زى الأول , وكذلك برده إحترامه ليكى 
فيه مثل باين أو مقولة بتقول : أهلك لتوهلك 
ماتبيعيش أهلك عشان أى حد ,, خصوصاً لما تكون معرفتك بيه يادوب كام شهر !!


سابعاً :مش معنى إن أهلكم بيذّنوا عليكم عشان تتجوزوا , إن يوم ماتفكروا تتجوزوا يبقى عشان تريحوهم وبس !! لازم حتى لو وافقتوا على الموضوع وإنتو كنتو عاوزين تأجلوه شوية إنكم تحطوّا فى اعتباركم إنها مش أكلة هتاكلوها مجاملة وليهم وخلاص - وأهى أكلة تفوت ولا حد يموت - دى مسئولية وحياة وعمر كامل ماينفعش فيه مجاملة وماينفعش يبقى الهدف الوحيد فيه إنكم تريحوّا أهلكم !!

ثامناً وأخيراً:يلعن أبو الإختيار اللى بيقوم على بيت ولا عربية ولا ورث ولا أطيان
ربنا هيحاسبك على الأب والعيلة اللى اختارتيهم لولادك , وربنا هيحاسبك على الأم والعيلة اللى استأمنتهم علي ولادك .


هذه قناعات شخصية غير ملزمة لحد ,, وربنا يهنى سعيد بسعيدة

الشغل بروقان

يعنى أفتح أم كلثوم وأفتح الشغل اللى المفروض أخلصه 

ومن كتر الروقان أعيش معاه وأتعمق وأتعمق كمان وكمان .. 

ومش مهم يخلص مادام أنا مستمتعة :D

اليتم ..

اليتم ...
أكتر حاجة بتحسس الإنسان بالنقص
لما الأب بيموت , حياة الإبن/ الإبنة بتتقلب كل موازينها
بيكتشف إنه مش الشخص اللى فاكر نفسه هو طول عمره
بيكتشف إنه مش بالقوة والصلابة اللى كان فاكرها .. هو كان بيستمد القوة دى من وجود والده
يمكن بيكتشف لأول مرة الخوف من كل شىء وأى شىء .. خايف من حاجات أصلا عمره مافكّر فيها ,, الأمان اللى كان فى حياته راح !

فعلا فقدان الأب بيعيد تشكيل شخصية الأبناء كاملة , بيغير كل حاجة فيهم
إما بيزيدوا صلابة أو بيزيدوا هشاشة

يمكن الولاد بيميلوا ناحية الصلابة أكتر .. ويمكن بيكبروا قبل أوانهم بس الموقف عاوز كدا
هو لازم يحل محل أبوه , لازم يتحمل مسئولية نفسه وأمه وأخواته
يمكن بيكون هو البديل فعلا لكل شىء بيمثله الأب لولاده .. ماعدا لنفسه
لأنه بقا الكبير .. الكل مستنى منه التعويض عن اللى فقدوه , إنما هو راح اللى كان بيعوّضه

البنات يمكن بتميل للهشاشة بحكم الخوف
الخوف من كل شىء وأقل شىء
الخوف لأنها حاسة دايما إن اللى كان حاميها من الدنيا كلها راح .. وبالتالى كل شىء محسوب عليها وضدها
الخوف لأن أى حد (حتى وإن كان قريب ) هيدّخل فى حياتها بحكم الخوف عليها وإن مالهاش حد !
حتى لو كانت قوية .. عمر القوة دى ماهتبدد الخوف
الخوف الملازم للحزن دايماً .. لأن الفرحة دايماً ناقصة , والحزن فى أى موقف كبير
لأن أى موقف هيبقى تذكرة إنها يتيمة


اليتم إحساس صعب جدااااااااا , لايمكن يحس بيه زى صاحبه
ويمكن ناس كتير بتلوم اليتيم لو ماسمعش للكبار وخد رأيهم .. بس ماحدش بيحس بيه
ماحدش بيحس إنه بالنسبة لنفسه هو الكبير ودى حاجة راعباه مش فرحان بيها يعنى
كل الناس بعد أبوه بيقولوا رأي استشارى (من ع البر ) رأى حتى لو غلط فهو مش هيضرهم ومش هيحسوا بمرارته معاه لو كان غلط
كل الناس مهما كان قربهم .. مش أبوه وبالتالى الثقة فى رأيهم مش مطلق وعمره ماهيقرب للمطلق مهما حصل (ودى حاجة تانية برده مش مفرحاهم )
إحساسه إن ماحدش هيحّس بيه مهما إتألم , وماحدش هيشيل معاه لو غلط ..إحساس مفروض  عليه بعد موت أبوه ولا يمكن هيتبدد
وبرده غصب عنه !

اليتيم وبالخصوص اليتيمة مش محتاجة لوم كل شوية حتى لو قرارتها غلط
محتاجة حد يطمنها , يحسسها إن مش هيحصل حاجة حتى لو غلطت , يحسسها إن حد لسة معاها وهيقف جنبها مهما حصل


ربنا يرزق كل بنت فقدت أمانها بزوج صالح يعوّضها عن والدها ومايحسسهاش دايماً إنها يتيمة !
ربنا يرزقكم الفرحة

حياتك ولا حياة حد تانى ؟؟

لما تستنى تشوف إنطباع الناس على الأحداث المهمة فى حياتك -حياتك إنت - عشان تقرر إذا كان المفروض تفرح ولا تزعل .. يبقى إيه ؟؟ 
لما ماتحسّش بأى حاجة ناحية أى حاجة ,, فى حين إن اللى فى موقفك فرحان أو حتى زعلان .. المهم حاسس بحاجة , مهتم .. يبقى ليه ؟؟ 
لما تمثل إنك فرحان لحاجة مش عشان تنفى الزعل .. ده إنت بتتمناه لو لابد منه ,,
وإنما عشان تبيّن إنها فارقة معاك .. إنك عايش فعلا حياتك زى اللى حواليك .. يبقى مين السبب !!! 

إيه اللى حصل خلّى مافيش أى حاجة تخصّك فارقة معاك ؟؟

حوار صريح جدا جدا ..

فى قاعدة رايقة كدا مع ماما .. إفتكرت موضوع معين وابتديت أتعصّب فى الكلام :
-بصى يا ماما فيه موضوع كدا عاوزين نتفق عليه من دلوقتى -وإحنا بعيد عنه كدا- عشان مانزعلش من بعض
ماما : موضوع ايه ده ؟
- موضوع كل يوم بيتكرر , ما يعدّيش يوم إلا ونفس الحكاية تتحكيلى بحذافيرها , فمش عاوزين نعيشه بقا >:O
ماما : يابنتى بالراحة وقوليلى بس ايه الموضوع اللى مضايقك أوى كدا ؟
- موضوع الجواز والعرسان والصالونات
ماما : وإيه اللى بيحصل مع أصحابك بقا :D ؟؟
- مبدئياً الإبتسامة دى مش مطمنانى -_- , بس كل شوية عريس ولازم تشوفيه وشوية عياط كتير كدا , وخناقة , ثم زعل ثم خصام كام يوم كداهون ,, هو الأمهات بيحصّلهم إيه لما توصل للعرسان والجواز >:O
ماما : ليه يعنى ؟ الموضوع مش مستاهل كل ده ,, لو حد كويس ايه المانع
- أيوه أهو أهو .. شوفى أهو شكلنا هنوصل للخناقة دى فى يوم من الأيام >:O
ماما : ليه بس ؟؟
- ماهى (( حد كويس )) دى بتبقى بداية الخناقة :D.. ربنا يستر O_o


تقريبا اتشال من عليا منهج ساتة وبقا ده الموضوع المقرر ...!
المشكلة إن الموضوع مش مقتصر على البنات بس .. الخناقات شغالة مع الولاد برده اللى وصلوا للسن المناسب للجواز (من وجهة نظر أهاليهم ) ورافضين الموضوع دلوقتى

المشكلة الأكبر إن غالباً الآباء حتى لو اتقالهم سبب الرفض هيحسّوه تافه أو مش واقعى أو هيفنّدوه من الأخر .. ويبقى الحال على ماهو عليه 
لا الآباء بيقتنعوا ولا ولادهم بيتجوّزوا ولا الاتنين بيبطلوا خناق كل ما الموضوع يتفتح -_-