سينما مصرى .. معقول ممكن !!

مصر مافيهاش انتاج يعمل أفلام محترمة .. مافيهاش بس الا السبكى اللى ناوى على خرابها أكتر ماهى خربانة !!

يعنى غرق عبارة السلام ده بيتهيألى ممكن يكون راود كُتّاب كتير بس الفكرة اتقتلت طبعاً لأنهم عارفين إنهم مش هيلاقوا إنتاج محترم يسمحلهم يقدّموا حاجة محترمة

كذلك ماشفتش أفلام عن الثورة مثلا ّ.. فيلم كامل بيتكلم عنها وبيحكى تفاصيلها الصغيرة جداا الحلوة والوحشة .. كلها مجرد ومضات كدا فى كل الأفلام والمسلسلات اللى اتعملت بعدها ليس إلا , , أكيد بإستثناء السبكى برده وأشباهه اللى تحس ان التاريخ مابيعدّيش عليهم ,, الدنيا تتشال وتتحط وهما زى ماهما رقاصة وبلطجى وشوية هيصة وطلّع فيلم

غرق العبّارة ده لو اتعمل فيلم بشكل محترم يضرب تايتانيك بالجزمة
تايتانيك قصته فى النهاية تافهة برده .. شوية أغنية مش لاقيين حاجة يعملوها قرروا يطلعوا رحلة وقصة حب فكسانة برده لو فكّرت فيها بعقلانية شوية
بس الدراما والتصوير خلّوك تنبهر بكل حاجة فى الفيلم

تصوّر بقا لو فيلم حكالك عن اللى راجع من السفر بعد 10 سنين غربة بيكوّن نفسه وهو مليان أمل وشوق لأهله ومستقبله اللى ناوى لسة عليه ,
والا اللى راجع من الحج هو وعيلته ولا .. ولا ...

 

ده إنت حتى مش هتلاقى مشهد النهاية اللى قبطان السفينة بيحاول ينقذ الناس ومش مهم هو ولا رجالته , ولا المهندس اللى بناها لما مارضاش ينجى بنفسه وقرر يموت فيها لأنه السبب فى غرق كل الناس دول

هتلاقى قبطان هرب , وصاحب الشركة وابنه هربوا برده
وتولع السفينة باللى فيها

ده هيبقى نكد النكد .. لا تقولى تايتانيك ولا بتاع