بكل الحب .. مافيش حاجة اسمها حب :P
فى المجتمع بتاعنا إحنا مافيش حاجة اسمها حب للحب .. فيه حاجة اسمها حب للجواز
يمكن المعنى ده مش واضح أوى بالنسبة للولاد
بما انهم ممكن يحبوا بالكيلو .. تلاقيهم كل كام يوم بيحبوا واحدة
انما البنات كلمة بحبك بالنسبالها بتترجم تلقائياً إلى ( أنا عاوز أتجوزك ) ويمكن عشان كدا بتتعلق بيك وتحبك فعلاً
وبالتالى فمن غير المقبول ((بالنسبالى على الأقل يعنى ))
إن شاب ما يروح لبنت ويقولها "أنا بحبك " بدون مايكون مفكر فى موضوع الجواز
وبرده من غير المقبول إن نفس الشاب حتى لو ناوى على الجواز إن شاء الله ( أو معتبر إن ده الطبيعى )
يروح يصارح بنت بحبه ليها من غير مايبقى عارف هل أهله هيوافقوا على موضوع ارتباط فى سنه ده ولا لأ
وهل ظروفه وامكانياته هتسمح بارتباط قريب أصلاً ولا لأ
ألاقى بقا ماشاء الله عدد لابأس به من الشباب .. أى بنت تعجبه يحاول بكل الطرق انه يعرّفها
وبعتبر النوع ده أنانى جدااااااااااا .. ومش بيحب ولا أى هرى من ده
لأنه مافكّرش فيها ولو لحظة .. مافكرش ان البنات لما بتتعلق بحد مابتقدرش تنساه بسهوله وإن حياتهم بتتقلب رأساً على عقب
مافكرش فى تبعات الموضوع ..
هل لما يقولها كدا هيسعدها ويخلّى حياتها أحسن ولا هيتعسها ويأثر على مستقبلها ويخلى شكلها زى الزفت قدام أهلها , أصحابها وخلافه , والأهم قدام نفسها
يعنى كتير جدااااااااا
ألاقى شباب صارحوا بنات بحبهم أو اعجابهم بيهم , والنتيجة ان البنات دى بتتعلق بيهم جداا
ثم يجوا يتكلموا عن المستقبل يلاقوا مالوش ملامح أساساً
يعنى لاهو محدد طريقه , ولا ناوى ياخد خطوة جد فى موضوع الحب ده فى الفترة دى اصلا , ولا ظروفه تسمحله بأى ارتباط من أى نوع
طيب ايه اللى خلاك تنسحب من لسانك وتخليها تتعلق بيك !!
وتكون الحجة الواهية .. أصلى خايف إنك تضيعى منى
وأكنه عقاب للبنت انه حبها .. (( أنا بحبك ومش هقدر ارتبط بيكى فلازم تتعلقى بيا عشان ماترتبطيش بحد تانى )) !!
حب ايه ده اللى انت جاى تقول عليه !!
الشخص اللى أحترمه وأقدره وأصدق حبه بجد
هو اللى يكتم حبه لحد مايرتب نفسه وظروفه .. ويكون متأكد "بنسبة كبيرة يعنى " إن لما يصارح البنت اللى بيحبها بحبه هيكون قادر يتحمل مسئوليات الكلمة دى
لأن الحب مش حمل أو هم على قلبك عاوز ترميه على حد تانى وخلاص
الحب مسئولية .. فماتعترفش بحبك لحد مادام مش هتقدر تتحمل المسئولية دى
وإنتى يا سندريلا :D
ابقى خلى عقلك يسبق قلبك بخطوتين كدا .. مش أى حد يقولك بحبك تطبّقى عليه كل أفلام الحب اللى شفتيها وتعتبريه فتى أحلامك O_o
ردّى بعقلك قبل ما قلبك يلّبسك فى حيطة .. وتقضى شبابك فى سماع أغانى الهجر والفراق والآهات .
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.