فيلم هندى

زمااان .. مش زمان أوى يعنى 
لما كنت فى اعدادى .. كان كل يوم خميس بيجى فيلم هندى على MBC 
وطبعاً يوم الخميس كان أجازة بقا بالنسبالى ومسموح أقعد قدام التليفزيون براحتى 
فكان أساسى إنى أتفرج على الفيلم ده .. 

وطبعاً الأفلام الهندى معروف فيها ان الكل بيموت أو بيتقتل أو بيتحرق أو بيتخنق أو بيحبوا بعض وبعدين يطلعوا اخوات 
يعنى موعد إسبوعى مع الكآبة والعياط :D 

وده كان شىء صحّى جداا بالنسبالى .. عشان بيطّلع كل المشاعر المكبوتة بقا وكل الشحنات اللى اتجمعت على مدار أسبوع :) 

دلوقتى بقيت بضحك من الأفلام الهندى دى .. من كتر ماهى مأفورة 
وبالتالى مابقيتش بعّيط .. وبالتالى فقدت الموعد الإسبوعى بتاع تفريغ الشحنة السلبية
لأن على عكس ناس كتير .. مش من النوع اللى بيقدر يعيّط فى الوقت اللى عاوز يعيط فيه .. بتقلب معايا بضحك مش عارفة ليه :D

وبناءاً عليه .. فالشحنة السلبية دى عمالة تتراكم تتراكم ومافيش مجال لتفريغها فطبيعى إنى ما أبقاش طايقة حد وأقل حاجة ممكن تضايقنى .. وده غلط طبعاً على صحتى :D

وده اللى بيخلّينى أفكر ياترى ممكن أعّوض الأفلام الهندى بايه ؟!!