بقالي كتير أوي ماكتبتش هنا
ولقيت إن آخر حاجة كتبتها كانت عن الخوف
تقريبا من ساعتها وأنا خايفة فعلا ولذلك ماعملتش أي تقدم
ورجعت النهاردة عشان أقول ...
مش هقدر أنفي وأقول إنى مش خايفة
لأ لسة خايفة من حاجات كتير .. بس الخوف رغم إنه عطلني كتير جدا وخد من تفكيرى ومجهوجى ووقتي كتييير جدااا
بس قدرت أهزمه فى حاجات برده
خايفة من فكرة الارتباط ودخول حياة جديدة بمسئوليات جديدة بس دخلتها وسعيدة بيها حاليا
خايفة من شغل البرايفت وفكرة إني أبقي مسئولة لوحدي عن مرضي .. بس نزلت وجربت وتعاملت
الخوف من بعيد زى أفلام الرعب بالظبط .. مبالغ فيها جدااا
ممكن فيلم يرعبك جداا من حاجة ماتعرفهاش وكل ماكنت جاهل بيها كل ما رعبك منها ومن تجربتها زادت ويمكن تفضل طول حياتك مرعوب من إنك تقرب منها بسبب فكرة اتزرعت جواك من فيلم !
غير لو انت مجربها وعارفها ... هتبقي مدرك إنها مش بالمبالغة دى كلها
آه فيه جزء من الحقيقة بس بتقدر تتعامل معاه يعنى وتتغلب عليه
الرعب ده مش بيتززرع جوانا من الأفلام بس
لأ ممكن من كلام اللي حوالينا وتهويلهم لكل حاجة مش عاجباهم في حياتهم , شغلهم , دراستهم
بيتهيألك وإنت بعيد عن عالمهم إنهم بيآسوا .. أو إزاي مكملين في كل الحروب دي !
بس سبحان الله السؤال هو نفسه الإجابة .. (( إنهم مكملين ))
ماوقفوش .. وما ماتوش رغم كل اللي بيحكهولك في قصصهم دي !
بس وقّفوك إنت من كتر رعبك إنك تبقي زيهم
إنت بس اللي وقفت ..
أنا بس الل وقفت
بس نويت أكمل .. وأول الطريق إنى رجعت أكتب هنا 😊
