يوم بادىء بحادثة وكنا على شفا حفرة من الوقوع من فوق كوبرى الجامعة لولا ستر ربنا 

ثم تهدئة البنات والسيدات اللى كانوا راكبين معايا لأنهم اتخضوا جامد 

ثم راوند النسا وضحكى مع أصحابى والتريقة إنى كنت هموت وأسيبهم وياترى كانوا هيعملوا ايه

ثم بداية استيعابى فعلا إنى عملت حادثة وكنت هموت وحبس الدموع لمجرد تخيّل شكل ماما لما تعرف الخبر

ثم إدراكى لكمية الإرهاق اللى أنا فيها من كمية الضحك اللى لازم أضحكها كل يوم فى وش الناس اللى أعرفهم مهما كانت حالتى

ثم مقابلتى بناس وحشانى وماشفتهمش من فترة طويلة ..

ثم قرارى بإنى أخرج معاهم حتى لو كان مزاجى وحش لأنى مش عارفة هشوفهم تانى امته

ثم إضطرارى إنى أكمل ضحك وهزار لأن مش ذنبهم إن مزاجى وحش وهما خارجين يتبسطوا وعشان فعلا أنا مبسوطة إنى معاهم

ثم رجوعى للبيت مرهقة كلياً فعلاً لدرجة إنى مش قادرة أسلم على ماما أو أتكلم معاهم 

ثم بعد فترة طويلة فى أوضتى أقوم أشيل الورق اللى سيبته الصبح على سريرى فألاقى تحته دول 

من أختى عشان زعلانة منها .. وطوّلنا شويتين

ثم ((حلو الحلو بكل خصاله )) كنت بطبعها الصبح عشان نفرّح واحدة صاحبتنا ونعملها مفاجأة :) .. وألاقيها مكتوبالى بالليل عشان تفرّحنى !!!

ثم أنا ماستاهلش كل الناس الحلوة اللى فى حياتى فعلاً وهما يستاهلوا يكون فى حياتهم حد أحسن منى بس ربنا اللى رحيم وكريم 

وبيبيّن بس إن الواحد أتفه من إن ربنا يغضب عليه ويحرمه من رحمته .. 

فكل اللى انا فيه فى الدنيا ده كرم بس وعمره ماهيكون استحقاق

اللهم إنى أعلم أنى أعصيك 

ولكنى أحب من يطيعك 

فاجعل اللهم حبى لمن أطاعك 

شفاعةً تُقبل لمن عصاك