المشكلة مابقتش تحقيق الحلم .. 

المشكلة بقت الحلم !

وعاظ السلاطين

قريته على الموبايل فللأسف ماقدرتش أحتفظ بالاقتباسات اللى عجبتنى

الكتاب نفسه شايفاه جرىء وإن كنت مختلفة مع حاجات كتير فيه
يعنى مثلا اللى فهمته إن الوعاظ أو الدعاة والشيوخ .. بيدعوا الناس لصورة مثالية أفلاطونية غير موجودة فى الدنيا أصلا واستحالة تكون موجودة
أنا معاه إن الصورة دى مش ممكن تكون موجودة فى بشر بس مش ضد الدعوة ليها
لأن لما يدعوا للمثالية واحد هياخد في طريقة خطوة .. حد تانى خطوتين ,, وهكذا
أكيد ماحدش هيوصل للمثالية فعلا بس على الاقل هننشدها وهنحاول دايما نبقى أفضل
إنما لو كانت الدعوة لأقل منها !! ماحدش هيصّلح من نفسه أصلا مادام دى طبيعة النفس البشرية بقا !!

يعنى مثلا فيه دعوة بتقول " كونوا عباداُ ربانيين " عن طريق انك تتصف بصفة من صفات ربنا
هل لما واحد يعمل أعمال بحيث إنه يبقى كريم ...
هل كدا وصل لدرجة الكرم بتاعة ربنا !! لأ أكيد وهو عارف ده بس هو بيحاول يتقرب لربنا بصفاته وبما يحبه يكون عليه
وأهو عايش فى الدنيا بيحاول يبقى أفضل وأحسن .. وأكيد هيجازى على هذه المحاولات حتى لو ماوصلش

إنما لو قلت للناس إنتو طبيعتكم أصلا كدا واللى بيتطلب منكم ده مستحيل ومافيش نفس بشرية بالكمال ده !! ماحدش هيحاول يغيّر من نفسه أصلا
ماحدش مثالى لأنه مستحيل يجتمع فيه كل حاجة كويسة .. بس لا يمنع إنه ممكن يبقى مثالى (أو قريب من المثالية ) فى صفة معينة

ومع ذلك معاه فى حتة التعجيز اللى الدعاة بيعملوه كتير أوى للناس .. يعنى مش بيشجعوهم بإن المحاولة نفسها سيجازوا عليها أكيد ,, وإنما دايما بينفرّوهم بالنار وإنهم مقصرين ومادام ماوصلوش للمثالية يبقى ولا يحلموا برضا ربنا ولا بجنته ..
*********
يمكن لما كملت قراية .. حسيت إن يمكن هو ماكانش يقصد المعنى اللى اختلفت معاه 
كنت أتمنى إنه ينقسم إلى كتابين لأن المقدمة عامة عن الوعاظ  ويمكن يقصد منافقين الحكام اللى بيفّصلوا أحكام تناسب أمزجة الحكام وهواهم لينالوا المنح ,,
ثم باقى الكتاب بيتكلم عن الخلاف بين على وعثمان ثم الانقسام إلى شيعة وسنة
ماعجبنيش الربط بينهم وحسيتهم كتابين مالهمش علاقة ببعض 

بس فى النهاية الكتاب مهم جدا وجرىء ويستاهل إنه يتقرى

إكتب ..

كتاباتك هتفكّرك فى يوم بنفسك لما تنسى .. كتاباتك حياة تانية إنت نسيتها :)

لستة الأطفال :)

بما إنى لسة مابدأتش أطفال أصلا فنعمل لستة تدخل تبع الجدول بتاع المذاكرة بقا بالمرة :D 
جايز هى اللى تخلص ^_^ 

تكملة كتاب وداعاً أيها الملل .. أنيس منصور
كتاب طريق الهداية .. الغزالى
مهزلة العقل البشرى .. على الوردى 
الأوباش .. خيرى شلبى
نقطة النور .. بهاء طاهر 

وكفاية كدا 
طبعا اللستة جايز جدا تتغير كلها أو بعضها .. حسب المزاج وحاجات تانية كتير 
ماهو مش إمتحان أطفال ده كمان :P

من شر حاسد إذا حسد

 

أعتقد إن معظم الناس كانت بتضحك على أمينة وهى بترقى سى السيد كل يوم وهو نازل من البيت 

( من شر حاسد إذا حسد ) 

قال يعنى مافيش زيه! 

ومع ذلك معظم الشعب دلوقتى بقى رايح جاى عامل زى أمينة بس بشكل عصرى .. وهو الشكوى وإدعاء الفشل والمرض 

الموضوع بقى مزمن وسخيف .. لأن مش أمينة بس اللى كانت مش متعلمة وفى مجتمع أصبح من التراث دلوقتى اللى بقت تعمل كدا 

لأ كل المستويات وكل الثقافات بقوا كدا .. بما فيهم المؤهلات العليا اللى كانوا زمان حاجة كبيرة أوى 

دلوقتى كل واحد بيشتكى أول مايتوجهله كلام أو حتى تهنئة أو يمكن كلام عادى جدا مش مقصود من وراه أى حاجة .. لازم يبيّن هو أد ايه فاشل أو تعبان أو عنده مشاكل الدنيا كلها 

مش كفر بالنعمة ولا حاجة بس هو فعلا خايف من الحسد .. خايف من العين !! 

سواء فى المذاكرة فى الشغل فى الحالة الاجتماعية فى الدرجة العلمية فى أى حاجة  ...

والنتيجة إن المستوى العام إننا عمالين ننزل لتحت

لأن نسبة غير قليلة بتتأثر بالكلام ده سواء بشكل مباشر بإنها تبطل تشتغل أصلا -ماهو كله بيفشل يبقى ليه أقرف نفسى وأتعب ! 

أو بشكل غير مباشر إن عقلك الغير واعى يخزن كل ده ولما تيجى تشتغل يقولك .. كدا كدا هتشفل , فرقت ايه عن الناس التانية يعنى !! 

أو هتبص تلاقى إن حياة الناجحين كلها شكاوى (حسب كلامهم طبعا ) ومافيش نجاح فعلى .. مع إن ده مش صح , فقدرتك على التحدى والنجاح تقل !

ولما تلاقى طبعا اللى أعلى منك بيشتكى بتبدأ إنت كمان تشتكى ; ماهم أحسن منك وبيشتكوا أهو يبقى إنت اللى كويس !! 

وخصوصا لما تلاقى اللى أفضل منك ده بيقولك كلام شبيه بالحسد فعلا مع إن حاله أفضل من حالك ! 

دايرة وبتّوصل لبعضها.. والموضوع عمال يزيد ويزيد 

وضع سىء جدااااااااااااااااااااااااااااااا وبيزيد 

بدل مانتحدى بعض عشان نوصل للأفضل .. عشان نشوف غيرنا ازاى ناجح ونحاول نقلّده 

مابقاش فيه تحدى أصلا .. لأن كل واحد خايف أصلا يقول وضعه بجد .. لأن طبعا العين وحشة !

يمكن كل حاجة حوالينا بتخلينا واحدة واحدة نعمل كدا بدون وعى مننا 

بس أنا وإنت وكل اللى حوالينا .. سبب فى الإنحدار اللى احنا فيه 

فحتى لو كان حالك وحش (وإن كان أكيد مش فى كل حاجة ) ,, لو كنت خايف فعلا من العين والحسد 

بدل ماتبقى سبب من أسباب الانحدار ده .. إسكت 

مش قادر تقّدم حاجة كويسة وكلمة مشجعة .. 

إسكت ياريت كلنا نسكت .. 

ولو حالك وحش فعلا اشكى لربنا .. مش للناس .

مشكلة

فيه حاجات أحياناً تبقى جواك ماتقدرش تعبّر عنها بأى شكل . لا كلام ولا كتابة ولا أى شىء 

مافيش حاجة ممكن تعبّر عنها ... 

وعدم خروجها من جواك والتعبير عنها ..... مشكلة !

معك أم ضدك !!

أمر مخيف لما تتدبر شوية وتلاقى إن أى حاجة بتعملها مهما كانت تافهة بالنسبالك أو مش واخد بالك منها هتقف إما معاك وإما ضدك يوم الحساب

مافيش أى حاجة هتقف ع الحياد

لا كلمة ولا نظرة ولا حرف ولا فكرة .. ولا أى شىء هيقول أصله ماكانش يقصدنى أو ماكانش واخد باله إنى هشهد عليه 

كله هيقف ويشهد .. وإما معاك أو ضدك 

أمر مخيف جدا والمخيف أكتر إن فيه حاجات كتير أوى ممكن تكون ضدك وإنت مش واخد بالك إنك بتعملها أصلا !!

" ربنا ظلمنا أنفسنا وإن لم تغفر لنا وترحمنا لنكونن من الخاسرين "

 

فليكن

وبعد بيان الاتحاد امبارح بخصوص الامتحان اللى بدل مايلغيلنا شوية زوّدلنا لستة مواضيع عمرنا ماسمعنا عنها أصلا :D .. 
قررت أعمل لستة بكتب وروايات تخلص مع الباطنة (مع إن الموضوع ده ماكانش فى نيّتى نهائى وكنت ناوية أركز مع الباطنة ) بس هى اللى بدأت :P 

ونبدأ اللستة بـ 
- كنارى
- تاريخ الخلفاء (وصلت لنصه ومافتحتوش تانى فإن شاء الله يخلص ) 
- مهزلة العقل البشرى
- صالح هيصة .. أتعرف بقا على خيرى شلبى ,  ولو عجبتنى ننقل على اللى بعدها
- الأوباش
- قواعد العشق الأربعون 
- نرجع تانى لمحمود درويش .. ليه لأ :D 
- رأيت رام الله  .. أتعرف برده على مريد البرغوثى لأن عيب أوى إنى ما أكونش قريتله حاجة لحد دلوقتى 

كفاية كدا على الباطنة ولا ايه !!! 
هنشوف .. هى اللستة هتروح فين يعنى ^_^

N/B : خلصت منهم فعلا ..كنارى , صالح هيصة , قواعد العشق , 
ورواية ماكانتش ع البال اسمها برغم الفراق ونص كتاب وداعاً أيها الملل لأنيس منصور ..

كويس برده مش وحش :)

inspire to be inspired

إنك تشجع غيرك ده فى حد ذاته تشجيع لنفسك 
كفاية إن الكلام اللى بتقوله هيرّن فى ودانك تانى وهتسمعه إنت كمان وأكيد بشكل أو بآخر إنت محتاجه برده ,, 
وهتلاقى الآية اللى بتقول (ويأمرون الناس بالبر وينسون أنفسهم ) برده بترّن فى ودانك لو عملت عكس اللى بتقوله لغيرك .. وهتتكسف من نفسك لو مانفذتش إنت كمان كلامك

أو يمكن زى ماشجعت حد فى وقت هو محتاج فيه ده 
ربنا هيبعتلك برده حد يشجعك لما تبقى محتاج إنت كمان 

مش بيقولوا الدنيا داين تدان !!
أهى برده شجّع تتشجّع ^_^

إعتادت التجاهل حتى جهلت !

الفيس ومواقع أخرى

الفيس من المواقع اللى منتشرة جداااا بدون فايدة تذكر ..
وعن نفسى بعتبره مصدر لتضييع وقتى , استفادتى منه مقارنةً بالوقت اللى بقضيه عليه تقريبا محدودة جدا 
مؤخراً وقع تحت إيدى كام موقع حلوين جداااا وفعلا ليهم فايدة وهدف محترم بس اللى مواظبة على زيارتهم يومياً فعلا اتنين حتى الآن 
هما 
http://tree.mindbloom.com/ 
وده فكرته ببساطة 
شجرة .. بتمثل حياتك 
أورقاها .. أهدافك فى الحياة 
المفروض إنك توّفرلها حاجتين كل يوم :
#الشمس (اللى هى عبارة عن your inspiration الحاجات اللى بتشجعك وتحمّسك فى يومك ) 
#والميه عشان ترويها ( ودى عبارة عن your actions ) اللى بتنفذها كل يوم 

وبالتالى بتؤدى إلى تنمية هدف معين وبالتالى بتكبّر الشجرة وتكبّر إنتاجها :)

بالإضافة لحاجات تانية .. 
زى مقالات كتير جدا كمراجع لأهمية كل حاجة ممكن تحب تعملها فى يومك وازاى تعملها وكذلك مواقع مختلفة لتنمية مهارة معينة عندك ,,
 
زى الأصدقاء اللى بيحفزوك وبتحّفزهم من خلال إنهم يدوك شوية ميه ولا شوية أشعة شمس ^_^ 

الفكرة على أد ماهى بسيطة وفى صورة لعبة , على أد ماهى جميلة وحتى لو أدمنتها فهتستفيد :)


الموقع التانى : 
http://www.lumosity.com

هدفه تنمية مهارات عقلك   .. من خلال مجموعة ألعاب بتلعبها كل يوم , كل لعبة ليها هدف مختلف عن التانية 
وأحلى مافيه إنه مش مفتوح ع البحرى :D .. لأن جزء منه بفلوس (وده مالناش دعوة بيه طبعا ) وجزء مجانى وهو بيتيح 3 ألعاب بس كل يوم ,, وبالتالى خلصتهم يبقى هتقفل الموقع ومش هتقعد تلعب بقا عليه طول النهار والليل زى ألعاب الفيس والموبايل والحاجات دى 


أتمنى أكيد إنى أقلل وجودى على الفيس ,, وأستخدم المواقع دى وغيرها بشكل مفيد والأهم بدوووووون إدمان :)

مرّوا فى حياتى

من فترة كدا بيلح عليا إنى أتكلم عن ناس قابلتهم فى حياتى .. 
كلام يمكن مش هيفيد حد على أد ما هيفيدنى ,, 
وأهو على سبيل التأريخ برده ; على غرار الكتاب الكبار بقا والناس اللى عاصرت خبرات وثقافات مختلفة .. 
أينعم أنا لا من الكبار ولا عاصرت كتير بس أهو نتشّبه بيهم يمكن نبقى زيهم ولا حاجة ^__^ 


N/B : حاسة إن العنوان نفسه ملطوش من كتاب كنت قريته أصلا وحاسة برده إنه غالباً لأنيس منصور أو عبد الوهاب مطاوع .. مجرد إحساس :D
عموما اذا كان كدا فعلا فأنا اعترفت فوق أهو إنى بتشّبه بيكم أصلا .. ماجاتش ع العنوان بقا ^_^

فلا تصحب أخا الجهل ** وإيـــاك وايــــــاه
فكـم من جـــاهل أردى ** حليماً حين آخــــاه
يُقاسُ المَرْءُ بالمَــــرْءِ ** إذا ما هُوَ ماشـــاهُ
وللشــيء من الشـــيء ** مقاييسٌ وأشبــــاه
قيـــاس النعـل بالنـعـل ** إذا ما هو حـــــاذاه
وللقلــب علــى القلـــبِ ** دَلِـيْلٌ حِيْنَ يَلْقَـــــاهُ

على بن أبى طالب

الحيرة !!

من الحاجات اللى بتخلينى أقرأ فى مواضيع معينة .. الحيرة 

أبقى محتارة فى موضوع معين أو موقف معين فأقرأ عنه لعلّى أفهم أصله من فصله .. 

المشكلة بقا إنى أخلص قراية وأنا محتارة أكتر من الأول .. 

إما لنفس الموضوع أو لتفاصيل تانية جوا الموضوع

"وأخرج وحيرتى أشد مما دخلت "

!!

الخطأ .. ندم واستفادة

أنا من الناس اللى اعتقد يعنى بتاخد بالها من أخطاءها إلى حد كبير وبحاول أتجنبها بعد كدا 
وبعتبر الخطأ حاجة مفيدة لأن الاستفادة منه بتبقى أكبر 

المشكلة بقا فى الندم .. 
بالرغم من انى بشوف الفايدة مع الخطأ اللى عملته إلا إنى بلوم نفسى كتير جدا عليه
لأن مش كل خطأ بيبقى خالى من الخسارة .. وكتير مابتبقاش الخسارة هيّنة 
أحياناً بتبقى أشخاص مهمين , أو حاجة مهمة فى حياتك 

آه بتتعلم إنك ماتعملهاش تانى بحيث ماتخسرش حد تانى .. بس بالنسبة للناس اللى انت خسرتهم فعلا !!!
استفدت بس خسرت .. 

من الأوقات الغير محببة إلى نفسى .. ولكن لابد منها !

وَهُمْ يَحْسَبُونَ أَنَّهُمْ يُحْسِنُونَ صُنْعًا

 

الآية دى مرعبة :(

فجوة

فى كل مرة بتكلم فيها مع حد من الكبار .. دكتور فى الجامعة , مشرف المعسكر , قريب أكبر سنا , مدرس .... 
النماذج اكيد اللى الواحد ممكن يعرف ياخد ويدى معاها بصدق ,, مش اللى بتحب دايما سيادتكم وحضرتك والله ياست ! 

على الرغم إن النماذج دى بتدينى أمل إن لسة فيه ناس كويسة وبتساعد وممكن تسمع , إلا إنى بلاحظ معاهم برده الفجوة الأبدية الموجودة بين الأجيال المختلفة 
برغم الانفتاح الموجود دلوقتى والشبكات والمواقع اللى المفروض مخلياهم عايشين معانا أو بمعنى تانى عايشين تفكيرنا , إلا إن الفجوة دى مابتقربش ولا مللى واحد !

فجوة كبييييييييييرة تتجّلى فى اللحظات القصيرة جدا بين اللى بنقوله واللى بيفهموه ..
يمكن إحنا اللى مابنعرفش نعبر عن رأينا صح وبشكل أوضح !! - آه أحيانا , بس مش دايماًَ

فى المعسكر لما حصلت مشكلة بين المشرف وواحد من زمايلى فى الفوج بتاعى .. ورغم التظاهر بإن الموضوع اتحل وانتو زي ولادى ,, إلا إن فى حوار جانبى بينى وبين المشرف بهدف توضيح الأمور وإن المقصود غير اللى هو فهمه .. إكتشفت إن المبادىء نفسها مش واحدة وبالتالى محتاج بقا عشان تقنع حد بفعل معين ليك أو قول معين إنك تناقشه الأول فى المبدأ ثم تقنعه بمبدأك ومن ثم هيفهم قصدك 

المشكلة ببساطة إن زميلنا ده ناقشه واعترض على رأيه فى مهمة معينة كان المفروض بنعملها .. 
المشرف كان شايف أنه لو قال أنا آسف لطالب يبقى المفروض الطالب يسكت ومايكملش كلام ويحترم السن وكل حاجة وينفذ بقا المطلوب ,, 
فى حين ان الزميل شايف إن من حقه الاعتراض وتوضيح وجهة نظره حتى بعد ( آسف ) مادام باحترام وعدم تجاوز !! 

إزاى بقا أصلا تقنع المشرف اللى مقتنع إن أى كلام بعد (آسف ) منه هو عدم احترام ليه من الأصل ,, إن ده تعبير عن الرأى ومالوش دعوة خالص بآسف من عدمها !!

حاولت يومها أدّور على مداخل مختلفة أوّصله بيها انه مختلف معاه فى رأيه ودى حاجة مالهاش علاقة بالاحترام لأنه محترم واسلوبه كمان محترم .. ونلف نلف ونرجع لنفس النقطة (إزاى يرد بعد كلمة آسف منى )  !! 

تعبيرك عن رأيك فى وجود الكبير ممكن أو كتير جدا بيبقى أصلا أصلا غلط .. من وجهة نظرهم 
وعدم احترام ليهم .. لو كان عكس رأيهم ,, لأنك ببساطة رحت ولا جيت لسة عيل , هتفهم ايه انت يعنى ! 

المفروض من الاحترام إنك تسمع وتقول آمين .. تقريباً !

النماذج اللى أنا بحترمها وبقدّرها فعلا فى المحيط بتاعى .. واللى أكيد بيكونوا منفسى الوحيد للنقاش ((على اعتبار ان أكيد معاهم الاختلاف مش هيعمل مشكلة )
فى موقف أو آخر بكتشف إن ليهم نفس المبادىء دى والاختلاف بيعمل مشكلة فعلا ,, وبالتالى معظمنا هيقع من نظر بعض عاجلاً أو آجلاً 
ودى حاجة تضايق لأن لازم يبقى فيه تواصل ونقل خبرات وإلا الصغير هيتعلم من مين !! 
بس ازاى نوصل لبعض ونسد الفجوة دى !!!

النماذج المعاكسة -كدا ولا كدا- لو وقفت على راسك مش هتوصلهم وبالتالى مابيبقوش فارقين معاك.

************
موقف حصل النهاردة شبيه بموقف المعسكر وخلانى برده محتارة !!
من حقى أعبر عن رأيى لأن ده جزء من احترامى لنفسى .. ورأيى لمن هم فى سنى مفهوم وإن اختلفوا معايا
ولكن رأيى فى نظر اللى أكبر غلط وعدم احترام ليهم

نسد الفجوة ازاى !!!

ياصديقى ; مَن سرقـ'ك' .. منـ'ك' !!

فكرة

الإبداع فكرة ,, 

التطوير فكرة ,, 

التغيير فكرة ,,

حياتك نفسها فكرة .. 

كل حاجة فى الدنيا دى أصلها فكرة .. 

بس فيه فكرة بتعيش وبتتحقق وبتفرح بيها ومعاها زى طفلك بالظبط اللى بتنتظره 9 شهور وبعدين تشوفه فتفرح بيه وبعدين تكبّره وتكبر معاه ,, 

وفيه فكرة بتموت ويمكن قبل ماتشوف حتى النور .. 

وموت فكرتك ده إنت ممكن تكون مسئول عنه 

لما ماتعرفش تقولها لمين وامته وازاى ! ,

لما تختارالأشخاص الغلط على أمل يساعدوك فى تحقيقها فبدل مايشجعوك تحييها هيقتلوها جواك , 

لما تستسلم مع أول صعوبة تواجهك فى سبيل تحقيقها , 

لما تسلم مفاتيحها لحد غيرك مش فاهمها .... 

لما حاجات تانية كتير بتعملها وتكون نهايتها موت فكرتك !! 

وموت فكرتك ده زى موت طفلك برده .. خصوصاً لما تتعب فى تحضيرها والتخطيط ليها 

وإوعى تفتكر إن موت  الفكرة بالساهل كدا .. 

تأكد إنها لو  اندفنت قبل ماتشوف النور .. هتاخد حتة منك معاها 

ياترى فيك كام حتة ممكن تموت لحد ماتبّطل تفكّر ... لحد ما تمووووت ! 

خّلى بالك من أفكارك .. خلّى بالك من نفسك

الــ nuts ^_^

المكسرات أو الـ nuts 

عشقى اللى أكيد مش أول ومش هيكون أخير يعنى ..  بلاش مبالغة :P 

أكيد فيه حاجات تانية حلوة فى الدنيا ممكن أعشقها عااااااااااااااادى 

فيه قدامك اختيارين لما تيجى تشترى إما تشتريها مش مقشرة أو ترّيح نفسك وتشتريها مقشرة 

أينعم أغلى وكل حاجة بس أكيد أحلى وأريح .. 

بدل ماتقعد لسة تقشّر وتكسر فى البندق واللوز وعين الجمل وياسلام لو ماعندكش كسارة بندق بقا وكنت بتستخدم إيد الهون زى حلاتى :D

والبيت كله يعرف إنك هتاكل مكسرات :O !! 

أينعم حاجة رخمة .. خصوصا لما تقعد تكسر نص ساعة وتفضح الدنيا وفى الاخر تلاقيهم شوية كدا مالهمش لزمة :( 

بس إكتشفت إن الموضوع ممتع برده على الرغم من كدا :D ... 

الممتع هو عنصر المفاجأة ^_^ ... 

مرة ألاقى بندقاية لوحدها , ومرة تكون بندقاية وأختها التوأم , ومرة لوزاية ومامتها :D 

المقشر مافيهوش الخاصية دى .. إنت ساعتها بتاكل وخلاص بدون تدّبر أو تفّكر :P 

لو سألونى ياترى ايه المهم فى جهاز البنت بعد طقم السكاكين أكيد يعنى :D 

هقولهم أكيد طبق المكسرات ^_______^

ابنى إبنك وماتبنيلوش ..
حكمة سمعتها مرة مش عارفة مين قالها بس بحترمها جداااااااا

بأى ذنب قُتلت !

بعض الآيات تصل بلاغتها عندى حد الصمت .. 
لا تستطيع أن تتحدث عنها أو تشرح ماتثيره فى نفسك عند سماعها لأنك على يقين أنك لن تستطيع مهما قلت أن تصف مابداخلك, 

ينطبق ذلك على هذه الآية (( وَإِذَا الْمَوْؤُودَةُ سُئِلَتْ بِأَيِّ ذَنبٍ قُتِلَتْ. -- سورة التكوير)) .. 

تثير هذه الآية بداخلى حزن عميق وشعور لا إرادى بقلة الحيلة وربما العجز .. فـحقاً بأى ذنب قُتلت !!!

لماذا كل هذا الحزن رغم عدم قراءتى لأى تفسير لها حتى الآن , وماذا تعنيه هذه الآية بالنسبة لى .. !
ربما اختيارى لها كعنوان لهذه المجموعة الخاصة من المقالات .. سيجيب - جزئياُ وضمنياً - عن هذا السؤال
فلم أبحث عن عنوان آخر لهذه المقالات لأنه ظهر أمامى تلقائيا عند بداية تفكيرى بها ..  وعلى يقين أننى لن أجد أبلغ منه وإن بحثت ..

#بأى_ذنب_قُتلت

على هذه الأرض ما يستحق الحياة ..

ثق بأنك ستكون يوماً ماتريد .. بل تعامل على هذا الأساس 

فهذا جزء من ثقتك بالله :)

ماتلّونيش خدودك .. ماتلبسيش حلق 

ده إنتى كدا بطبيعتك من أجمل ماخلق 

محرم فؤاد

الراديو بيجيب حاجات حلوة والله :D

من وحى الجيم والريجيم

الممنوعات بالنسبة لأى ريجيم بتبقى كتير وأهم حاجة فيها الشيبسى والشوكولاتة والبيبسى وطبعاً الحلويات
وبما إن أى انسان محروم من حاجة بيبقى نفسه فيها .. فاللى عامل ريجيم بيبقى حاسس انه بيجاااااهد نفسه عشان الحاجات دى ممنوعة عنه ,, حتى لو كان فى العادى مابياكلش منها كتير 
بس كفاية احساسه انه محروم منها عشان يبقى عاوزها 
ولذلك فى أى يوم فرى بتلاقيه بيفترى فى كل حاجة .. كل الأكل الممنوع وتلاقيه يعدى على السوبر ماركت يشترى نصه عشان يلحق اليوم الفرى قبل مايخلص 

طيب ده للإنسان اللى عامل ريجيم .. إنما اللى مش عامل ريجيم ومجرد رغبة عنده انه يخس ليه برده بيستهلك من الحاجات دى أكتر من العادى بتاعه !! 
ده بقا مع انه مش عامل ريجيم بس مجرد فكرة انه عاوز يخس مرتبطة بالريجيم والريجيم يعنى منع فلازم يتغلب على المنع ده وياكل بزيادة أوى .. مع انه فعليا مش ممنوع من حاجة لأنه مش عامل ريجيم أصلا !!


عن نفسى شايفة إن الحاجات دى فى غالبها ايحاء وفراغ أكتر من أى حاجة 
يعنى كتر أكلنا للحاجات دى بيكون غالبا عشان فاضيين وماورناش أى حاجة تشغلنا .. فنروح نجيب حاجة نتسلى فيها أو بمعنى أصح نضيع وقتنا فيها
(( بالظبط نفس فكرة فتحنا للتلاجة  كل شوية حتى لو مش جعانين .. بس لو لقينا حاجة بنجيبها فى ايدينا طبعاً ونقعد نتسلى فيها ))

وبعدين يصبح ده روتينا اليومى
لازم قبل أى خروجة أو بين المحاضرات أو حتى لو رايحين الجيم نعدى الأول على السوبر ماركت نشترى شوية تسالى .. حتى لو فعليا مش عاوزين أو مش محتاجين ولا جعانين أكيد ..بس هو ده الروتين 

والنتيجة إننا بنبقلظ بزيادة :D مع إننا فعلياً مابناكلش كتير .. ومش عارفين ليه !!

جربت أعمل ريجيم ويمكن الفايدة الوحيدة اللى طلعت بيها إنى قللت كتير من الحاجات دى ومش حاسة إن ناقصنى حاجة 
بالعكس حاسة فعلا إن غالبها كان فرااااغ مش أكتر 
وماعنديش رغبة شديدة انى أجيبها فى يوم الفرى مثلا .. لأنى ببساطة مش حاسة إنى ممنوعة منها 

........
الغلط والصح .. لو اتفرضوا عليك من المجتمع هتبقى عاوز تعمل عكسهم حتى لو فى السر 
إنما لو ركنت المجتمع باللى هو شايفه على جنب واقتنعت بحاجة فهتنفذها وهتكون مستريح نفسياً كمان
لو منعت طفل صغير من الشيبسيات والشوكولاتات لأنها مضرة لصحته هياكلها من وراك لأنه شايف كل أصحابه بياكلوها ولأن طعمها حلو طبعا ,, انما لو حس إنها وحشة فعلا مش هياكلها من نفسه 

وإحنا مهما كبرنا أطفال فى كتير من تصرفاتنا .. بس إحنا اللى بنكابر :P

قد يصنع كلٌ منا عالم خاص من السعادة , يتلخص فى ..
أكلة من أكلاتنا المفضلة وقد صُنعت خصيصاً لنا ,
قطعة شوكولاتة منسية فى درج من أدراج المكتب ,
أو ربما كوب من الكاكاو الدافىء فى ليلة شتاء باردة :)

فتفاصيل السعادة بسيطة - فقط - لمن يدركها :)

المستقبل !!

تُرى هل نرسم طريقنا بأنفسنا أم أننا فقط نسير على الطريق الذى رُسم لنا ربما من قبل أن نولد !

تُرى هل نعيش حياتنا أم الحياة التى إختاروها لنا !!!

إكتب

إكتب .. 

فالكتابة ستذّكرك يوماً بذاتك عندما تنساها ..

 كيف كانت وماذا صارت!

لو أن الماء الساخن يتغلغل إلى ذاتى ليغسلها ويّنقيها مما علق فيها مع الزمن ,

لو أنه .. !!

التربية ولا التعليم ؟

التربية الأهم ولا التعليم !! 

وأكيد مش قصدى التعليم اللى مالوش أى ستين لزمة اللى فى المدارس 

أقصد التعليم اللى بجد .. التعليم اللى المفروض يقوم بيه حد فاهم واللى هى مسئولية الاب والام فى المقام الأول ويمكن الأخير .. بما إنهم جابوا طفل للدنيا 

نرجع ونقول ايه الاهم فيهم ؟ التربية ولا التعليم!

وهل التربية هتنفع أصلا من غير تعليم ! تربية على أساس ايه !!

عيب وحرام وماتعملش كدا وماتعمليش كدا .. وخلاص !!
هى دى التربية ! أوامر والمفروض تتنفذ 

والسبب إنه عيب أو السبب الأكثر إقناعاً "عشان أنا قلت كدا " !!!!

طيب مين قال إنه عيب ؟ وليه عيب ؟ ولو الطفل بعد ماكبر فكّر وما اقتنعش انه عيب ولاحاجة .. ,
أو وصل لمرحلة التمرد على كل شىء واللى من ضمنها الأوامر بتاعت عيب وماتعملش وماتروحش .. 

يبقى كدا تربيته ضاعت !!!

التربية من غير تعليم .. كلام فارغ ,,
تربية من غير فهم  ليه ده صح وليه ده غلط .. بيت من ورق أول ما الطفل يقدر ينفخ هينفخه يطيره,, 

التربية القايمة على الحفظ بس .. حفظ ايه الصح وايه الغلط , ايه الحلال وايه الحرام , حفظ حفظ حفظ بدون فهم 

هتخّلى العقل فى يوم من الأيام يسأل ليه ؟ وساعتها ممكن كل اللى فاكر إنه مقتنع بيه ينهار 

لأنه فى الحقيقة ما اقتنعش بحاجة هو حفظ .. حفظ وبس

يبقى غلط خالص موضوع إن التربية أهم من التعليم دى

مش لازم أصلا ترّبيه .. بس علّمه 

علّمه صح .. وهو لما يتعلم صح هيتربى لوحده 

وهيعرف ايه الصح وايه الغلط عن اقتناع .. 

هيعرف يختار الصح فى الموقف اللى مش هتكون إنت موجود فيه عشان تقوله يعمل ايه ! 

التعليم أهم .. فـ اتعلّموا عشان تعرفوا تعّلموا لما يجى دوركم

باسيكاليا

فلسبب ما يفترض واضعوا اختبارات الشخصیة علي سبیل
المثال أننا نعرف كل شئ عن أنفسنا فقط لأنھا أنفسنا ، في
الواقع لو كان الأمر بھذه السھولة لصارت الحیاة أجمل...

-أنا أبسط مما تتخیلین يا سمر ، و لكن كون البشر معقدين يجعلھم يرون في بساطتي تعقیداً لھم.

ورغم ان الكلام اصلا بينقص حاجة كل مازاد !

لتانى مرة أكون بسمع أغنية وعاجبانى وتانى يوم ألاقيها أكتر اتغنت فى برنامج والفيس كله ما عندوش غيرها :D !

اول مرة كانت أغنية محمد منير .. حارة السقايين 
لما اكتشفت تانى يوم ماسمعتها إنه غنّاها فى أرب أيدول 

والنهاردة أغنية محمد محسن .. من زمان جداا 
أكون بسمعها الصبح بالصدفة وعجبانى , وبالليل ألاقيها مالية الفيس 
و بما إن الفيس كله كاتبها يبقى أعتقد إنه غنّاها مع باسم فى البرنامج 


يلا خير .. عقبال التالتة :D

سانت كاترين

19&18 / 2 / 2014

رحلة لازم أسجلها طبعاً فى كل مكان .. لأنها من الحاجات اللى مابتتكررش :)

تفاصيل كتير جدااا 

قبل الرحلة :

تردد /خوف/حماس/رغبة/ استفادة /فرصة /تأمل/.....

الخوف من الحوادث اللى بتحصل ووضع البلد اللى مش مستقر .. وده خوف الاهالى أكتر مننا واللى بينعكس علينا من كل مرة بنتكلم معاهم

التردد .. لأن الرحلة طويلة ومضمونها طلوع الجبل ودى مش حاجة سهلة بالاضافة ان ماحدش من أصحابى طالع ,, يعنى رحلة يومين معظمها فى الاتوبيس ولوحدى بالاضافة برده لرفضهم فى البيت أو عدم ارتياحهم للموضوع 

الحماس .. من كلام أصحابى اللى طلعوا قبل كدا

رغبة .. فى تجربة مكان جديد والتغلب على إحساس الخوف لأن الموت هيجيلك فى أى وقت حتى لو قاعد فى أوضتك ووسط أهلك ولو ع السفر فأى حادثة ممكن تحصلك وإنت مسافر للبلد اللى جنبكم مش لازم يعنى سانت كاترين

استفادة .. من السفر نفسه ومن التجربة نفسها حتى لو ماكانتش حلوة بالقدر الكافى بس أكيد هتعلم منها حاجة وده فى حد ذاته هدف

فرصة .. إنى أبعد عن الدوشة والقلق والأخبار والملل والحياة الروتينية جداا وإحس بجو مختلف ,, فرصة للهدوء والتفكير 

تأمل .. فى عظمة ربنا وابداعه وجمال صنعه اللى بننشغل عن تأمله فى زحمة المواصلات والدراسة والأصحاب والتعب والملل والفيس والتليفزيون ... 

قلق .. بسبب انفجار الاتوبيس اللى حصل قبل رحلتنا بيومين وفى نفس الطريق اللى هنعّدى عليه بالاضافة لخبر المجموعة اللى تاهت فوق الجبل اليوم اللى قبلنا على طول وموت 4 منهم .. واللى عرفناه واحنا فى الطريق بالفعل ..

وحاجات تانية كتيييير .. 

أثناء الرحلة : 

الرحلة بالنسبالى كانت مرهقة أوى لأن الطريق أطول مما كنت متخيلة بالاضافة لأنى مانمتش قبلها الا ساعة تقريباً وطبعا النوم فى الاتوبيس ده كان من المستحيلات

الطريق .. مع إنه طويل أوى وكله صحرا وجبال إلا إن سبحان الله مكوّنة أشكال رائعة والأحلى اللافتات اللى بتبقى موجودة من وقت للتانى على طول الطريق 

واللى منها "لا مهام مستحيلة" 

التنظيم ضايقنى شوية كمان وإن كان المنظمين نفسهم على قدر عالى من المسئولية وده اللى خلانى أتغاضى عن الموضوع ده

الجبل .. خطر فعلا وخصوصاً لما قربنا للقمة لأنها متغطية بالتلج تماماً وإحنا طبعاً لابسين أردأ نوع كوتشيات ممكن يتلبس للتلج :D 

الكوتشيات العادية بتاعتنا واللى اكتشفنا انها السبب اننا كنا هنموت من كتر الزحلقة واحنا طالعين وواحنا نازلين :) 

القمة والمنظر .. حاااجة راااائعة سبحان الله

الاستراحات .. عدم وجود استراحات فعلية على الجبل وانما خيمة كدا بسيطة لتقديم المشروبات ليس الا .. وطبعاً مع طول المدة اللى هى 3 ساعات طلوع وساعتين فوق تقريباً ثم 3 ساعات نزول فكان لازم نموت من التعب .. خصوصاً إن ماكانش عندنا خلفية عن إن الموضوع مرهق أوى كدا وماكناش عاملين حسابنا بالقدر الكافى على المدة دى كلها وكمان البرررررد اللى فوق قبل شروق الشمس .. والحر الحارق جداا بعد شروقها :O 

الجو .. طالعين واحنا تقريباً هنتجمد ونازلين واحنا بنشر عرق واتحرقنا من الشمس :)

 

التعب ده كله ماخلانيش قادرة أرد على حد أصلا ولا أستمتع بباقى البرنامج 

رغبة فى الوصول للأتوبيس بأسرع وقت ممكن واستغراق كامل فى النوم لمدة ساعتين مش عارفة نمت ازاى ولا ايه اللى حصلى :) 

زعلى كان إنى ما استمتعتش بالرحلة كما يجب من كتر التعب :)

بعد الرحلة : 

فعلا كانت تجربة فريدة من نوعها وتقريباً حققت كل أهدافى من الرحلة واستفدت كتير منها ,, نفسى أروح هناك تانى بس فى طيارة عشان ارهاق الطريق وياريت لوالطيارة تطلّعنى على القمة على طول :)) ويكون فيه تلج برده :) 

خبرات مابعد الرحلة ..
* إنى لازم أنام كويس اليوم اللى قبل أى الرحلة وإلا مش هستمتع بيها 
*يكون معايا كاميرا حلوة ولازم أتصور كتيييييييييييييييييييير جدااااا 
*لو رحلة أكتر من يوم لازم يكون معايا هدوم تانية احتياطى

* ما استسلمش للتعب وأحاول أستمتع بكل لحظة فى الرحلة :) 



الحمد لله الذى هدانا الى هذا :)

قناعات

وبعد مافضلت كتيييير أوى عندى أمل انى فى يوم من الأيام هقابل شيخ من الشيوخ الأفاضل المحترمين اللى هثق فى كلامه فعلا وهسأله عن حاجات كتير أوى محيّرانى وهيقنعنى أكيد بكلامه بدون ما أحس إنه بيفسر حاجة غلط أو بيهوّل أو بيمشى مع الماشى ..
وفقدت الأمل برده إنى أقابل حد محترم كدا وعاقل وعارف طريقه أو وصل لطريقه بمعنى أصح وبرده أهريه أسئلة عن الحياه اللى احنا عايشينها ومطبّتها والسواد الحالك اللى عمال يمتد من حوالينا شوية بشوية ده لحد ماقرّب يغطى أحلامنا خالص ..
بعد مافقدت الأمل فى إنى أقابل حد يقولى فعلاً ايه الصح دلوقتى وايه الغلط ,,
جارى تكوين قناعاتى الخاصة عن كووووووووووووووووووووووووووووول شىء .. ومش مهم رأى أى حد تانى .

سأتطور عندما أتوقف عن إلقاء اللوم فى كل خطأ أو نقص على الآخرين ..

أكتر حاجة مضايقانى فى نفسى إنى بقيت شبه ناس ماكنتش أحب أبقى زيهم 
بقيت  بتعامل فى حاجات كتير زى ما الغالبية بتتعامل .. مش زى ما أحب انى اتعامل 

بقيت شبههم مش شبهى ! 
مرهق أوى احساس انك تقول حاجة أو تعمل حاجة وانت عارف ان ده مش إنت :(