عشان تتوعدى ^_*

من عادات الشعب المصرى انه لما بيفرح بيحب يفرَّح الناس اللى حواليه معاه ,

الجيران والقرايب والاصحاب .. مش لازم يكون بينهم حتى علاقة قوية ولا حاجة ,

بيحب يفرح القريب والبعيد .. بيبقى نفسه الناس كلها تفرحله :) 

ودى بتكون بحاجات بسيطة أوى 

يعنى مثلا حلاوة المولود الجديد بيوزعوا سبوع على الجيران كلهم "حتى لو مايعرفوش بعض أوى " 

فى الفرح برده وفى الخطوبة تلاقى شيكولاتة وبمبونى وكحك وبسكويت وبيتى فور وحاجة ساقعة تتوزع على الناس كلها 

كل واحد واستطاعته .. بيخلى الناس تشاركه بطريقته :)

من وأنا صغيرة بقا 

كنت اسمع من جدتى الله يرحمها ومن ماما ربنا يخليهالى جملة كدا كل لما تجيلنا حاجة من دى ..

سواء من قرايب أو جيران أو اصحاب 

دايما يتقالى " دوقى كحك الفرح .. عقبال ماتتوعدى :) " 

بتتقال بطريقة مميزة أوى وتلقائية أوى .. بيبقوا فرحانين بجد :)

يمكن وأنا صغيرة كنت بستغرب فرحتهم دى لما يكون اصحاب المناسبة دى مش قرايبنا أو مانعرفهومش أوى يعنى ! 

يعنى كنت ساعات أفكر .. احنا نعرفهم منين عشان نفرحلهم أوى كدا لدرجة انهم يوّصونى كمان انى أفرحلهم ! 

حبة حبة لقيتنى بفرح أوى أنا كمان لأى حد يشاركنى فرحته بأى شكل 

مش فرحة بسيطة لأ .. بفرح فرحة أصحاب الفرح *_*

حتى لو ما أعرفهمش وعلاقتى بيهم مش قوية ..
كفاية انهم عاوزينى أفرح معاهم وأشاركهم فرحتهم :) 

بحس ساعتها انى أعرفهم جدا وبفرحلهم أوى أوى 

وببقى مبسوطة جدااا .. لأنهم اختارونى "أنا بالخصوص" عشان أشاركهم فرحتهم دى ^__^

لحد دلوقتى بحب أوى كحك الفرح  وبمبونى السبوع وشيكولاتة الخطوبة .. 

ولازم أدوقهم حتى لو أنا فى العادة "مابحبش آكل الكحك مثلا " 

بس لازم آكل منه ساعتها ..

لأكتر من سبب :
أولهم عشان ما أزعلش اللى حب يشاركنى فرحته "حتى وان كان فى حقيقة الامر مش هيشوفنى انا كلت منه فعلا ولا لأ "

تانيهم عشان أنا هحب الناس تعمل كدا وتفرحلى لما يكون عندى مناسبة حلوة

ثالتهم بقا عشان أتوعد بالفرح أنا كمان " زى ما ماما دايما تقولى :) "

يمكن ناس تقول على الكلام ده هبل  وماينفعش يتصدق .. 

بس انتو حرين ماتصدقهوش " و ماتبقوش تاكلوا من الكحك لما يجيلكوا :P "

أنا عن نفسى حابة انى أصدقه 

وهفرح للى عاوزنى أفرحله .. 

وهدوق الكحك بتاعه .. 

و.. !

ربنا يوعدنى :)