شوية رغى بدل النوم اللى مش جاى .. 
امبارح ارتكبت جريمة فى حق نفسى .. بس كان هدفى نبيل والله .. نبيل أخو سامية أيوه 
كنت فى شارع الترعة فطبعا عديت جبت ساندوتش شاورما من أهل الشام وأنا مروحة وأكيد تومية ..عشقى ^_^
المهم إنى كنت مستمتعة بيه جدااا ,, بس جيت لنصه وشبعت O_o
اللى هو ازاى يعنى ده مش أنا !!! المهم كملته عشان سمعتى فى وسط الأوساط الطبية ماتتزعزعش ولحد دلوقتى بطنى وجعانى :D 
ومن ساعتها بدوّر على السبب اللى وصل معدتى للكيوتنس دى بعد 6 سنين طب :O 
واكتشفت إنى :
-ماكلتش من بره تقريبا من أيام رمضان , 
-وشهر الحر اللى فات ده كنت عايشة تقريبا على الزبادى .. صبح ضهر ليل زبادى 
(بما إنه الحاجة الوحيدة الساقعة فى عز الحر وممكن أقول بكل فخر إنى كلت :D ) 
وفجأة المعدة تلاقى هجوم شاورما وتومية .. وغصب عنك هتكمليه لآخره :@

والله كنت عاوزة أدلعك .. مش أوجعك :D 
************** 
وبما إن الشمس على وشك الشروق
لازم أفتكر طبعاً حبى الشديد جداااا لفترة الشروق .. والشمس فى الوقت ده 
وأول مرة فى ثانوى مانمتش بالليل وفضلت سهرانة  للصبح عشان أفتح الشباك وقت الشروق والشمس تزغزغ عضلات وشى وتضّحكنى ^_^
الشمس فى الوقت ده مبسوطة .. فرحانة .. وبتوزع ابتسامات ع الصاحيين بس 
ولحد دلوقتى .. لو صحيتلها بدرى بتصّبح عليا وتزغزغنى :) .. فعلا بتنوّر وشى :) 

وعلى ذكر حبى للشمس .. 
كنت بحب أوى أوى مواعيد محاضرات أولى وتانية ,, اللى بدايتها 8 الصبح 
فلازم أصحى 6 وأكون نازلة من البيت 7 ..
والقاعدة أساسى فى الميكروباص الكرسى التانى ورا السواق جنب الشباك ,, عشان لحظة طلوعنا على كوبرى الجامعة
طول الطريق ظل وأول مانطلع ع الكوبرى أبقى فى وش الشمس :D .. وتزغزغنى فأبتسم غصب عنى ^__^
وبعد سلم الجامعة فيه عمارة كبيرة كدا تحجب الشمس 3 ثوانى كدا وبعدين تظهر تانى .. euphoria رهيبة :) 
كانت الميزة الوحيدة فى السنتين دول -_- 
*************
وبما إن القاعدة فى السرير فى محاولة استرضاء النوم بتقلب الدماغ وبتفكرك بحاجات غريبة 
فافتكرك علاقة ولاد خالاتى بماما وهما صغيرين ((قبل مايتجوزوا)) 
ماما هى الخالة الصغيرة وبالتالى ولاد خالاتى قريبين ليها فى السن 
كانوا دايما عندنا .. أى مشكلة تحصل بين حد فيهم وخالة من خالاتى يجى لماما يحكيلها ويحكّمها أو يوسطها تحلها 
وطبعا وقت جوازهم حاجة تانية .. ترتيبات وخروجات مابتنتهيش عشان الجهاز خاصة البنات منهم ,, بالتفاصيل الكتير جدااا بتاعتهم :) 

ساعتها كنت بحسدهم ع العلاقة دى وكنت زعلانة إن إحنا الأحفاد الصغيرين وإن ماما مابعدهاش أخوات تانيين يبقوا قريبين لينا احنا كمان فى السن , عشان نعيش معاهم علاقتها بولاد خالاتى :) 
دلوقتى كلهم متجوزين ومخلفين والدنيا اتغيرت ..... 

بس والله العيال ولادهم لو ماجم ينقشوا الكحك زى مانقشت لأمهاتهم وهما بيتجوزوا لأوريهم :D  ,, 
أينعم فيه من ولادهم اتجوزوا وأينعم ماعدتش حد بيعمل كحك فى البيت من أصله.. بس ماليش دعوة :P
ده أنا هخليهم يعملوا كحك فى البيت مخصوص عشان أخلص حقى منهم :P 


كفاية رغى بقا :)

فيه ظلم بيتجاوز قدرة الانسان على وصفه أو محاولة الكلام فيه
ظلم اكبر من انك تحاول تشرحه أو تجسّمه للناس عشان يقدّروا احساسك !
انت بتبقى متأكد ان ماحدش هيقدّر أو هيفهم ولا انت اصلا هتعرف توصف

ويمكن برده مش عاوز تسمع اى عذر
واللى انت عارف انه مش هيهديك وانما هيزّود وجعك واحساسك بالظلم ده

بأى ذنب قُتلت !
نفسى فعلا أصرخ فى ناس معينة وأسألهم السؤال ده
بس مش هيفيد وان خرج مش هيتنسى .. ومش هيرّجع اى حاجة
يبقى احسنله يفضل جوايا .. مش عارفة اتخلص منه ولا قادرة اتناساه !

العلاقـــات

من الحاجات اللى شغلت حيّز كبير من تفكيرى فى وقت من الأوقات هى علاقتى ببعض الناس فى حياتى ومسمياتها 

فكرة إن العلاقات أكتر بكتير من المسميات المتاحة اللى هى (أخوات , زملاء, أصدقاء)

كل مسّمى من دول ليه تعريف بين الناس .. ليه مدلول معين 

بس الناس فى حياتى مش كلهم بينطبق عليهم المدلول ده ! 

أخواتى بس هم اللى أخواتى .. غير كدا احترت فى تسمية علاقتى بكل الناس فى حياتى

فى الحقيقة مافيش خط فاصل واضح لحد فى حياتى عشان أقدر أقول دى زميلة وبس إنما دى صديقة 

فكرة إنى أقول على واحدة صحبتى دى زميلتى .. يبقى فى المتعارف عليه علاقة سطحية وليها حدود كتير 

ولو قلت إن دى صديقتى .. يعنى قريبة منى بدرجة كبيرة وليها حقوق وعليها واجبات 

بس ماحدش فى حياتى كدا أبداً .. مافيش صديقة زى ما الكتاب بيقول أو زى ما هو متعارف بين الناس . ولا كلمة زميل ممكن تعبّر فعلا عن علاقتى الحقيقية بزمايلى 

فيه فجوة كبيييييرة جدااا . بين مسّمى الزميل والصديق ,, ويمكن الفجوة دى بيتدّرج فيها معظم الناس فى حياتى 

وبعد الحيرة الكبيرة دى .. بدأت أفكر (( الأهم العلاقة ولا المسّمى !! )) 

لو لازم أسمّى العلاقة بين كل حد فى حياتى بماهو متعارف عليه بين الناس يبقى هظلمهم فعلا وهظلم علاقتى بيهم ..

كل حد فى حياتى ليه مكانة مميزة جدااا عن أى حد تانى .. 

وبالتالى بطّلت أفكّر فى المسّمى أو الإطار .. مش مهم الاسم , المهم المضمون 

مش مهم خالص الحدود اللى رسماها الناس بين العلاقات .. كل شخص فى حياتى ليه مساحة خاصة بيه ومن غير اسم 

والحيرة دى انتهت تماماً بعد ماقررت إن اسم العلاقة بإسم صاحبها .. 

يعنى لو حد سألنى علاقتك إيه بآيات مثلا .. مش هقول صاحبتى إلا عشان اللى قدامى مش هيفهم لو قلت غير كدا

إنما علاقتى الحقيقية بآيات إنها آيات .. بكل التفاصيل والحكايات حلوها ومرها اللى بينا 

إنما مثلا ثريا فهى ثريا .. بتفاصيل تانىة وشكل تانى مختلف تماماً عن آيات 

فى حين إن فى العام وبالمعنى اللى يفهمه الناس إن الاتنين أصحابى وغيرهم كتيييييييييييييير جدااااا ! 

وهكذا لـ سين , صاد من الناس اللى فى حياتى

أما بقا لنقطة مين أقرب حد ليا ,, أو مين أقرب صديقة والكلام ده برده 

هلامى وغير موجود فى حياتى 

كل أصحابى قريبين ليا بشكل مختلف ,, كلهم يهمونى وأنا أهمهم 

وكتير جدا منهم ممكن نقول إنهم رقم 1 فى الحاجة اللى المفروض مش هيعرفها الا الصديق (بمفهوم الناس )

العلاقات مضمونها أهم كتير من تسميتها , 

بل إن تسميتها ظلم كبير ليها .

الذنوب

الذنوب ممكن تتقسم تقسيمات كتير جدا  على حسب اللى بيتكلم عنها وهدفه من الكلام
أنا هقسمها تقسيمة قد تكون متعارف عليها أول لأ بس أنا ماسمعتهاش قبل كدا

وهى الذنب الذى تدركه والذنب الذى لا تدركه
فيه ذنوب -كبيرة كانت أو صغيرة - بتدرك معناها ، بتدرك سوءها يمكن مش فى وقتها أو غالبا مش فى وقتها
وفيه ذنوب بتعملها وإنت عارف إنه ذنب بس مش مقدّر حجمه الحقيقى أو معناه
قالولك أو قريت إن لو عملت كذا أو كذا أو كذا يبقى ارتكبت ذنب ولازم تستغفر أو تكفّر عنه
وفى الغالب برده بيبقى بشكل سردى ... قائمة الذنوب ١،٢،٣....
من غير شرح ليه ، من غير فتح باب النقاش
وحتى لو فاهم البعض فمش بالضرورة تكون مدرك المعنى الحقيقى للى فهمته
يمكن ياخد منك سنين وسنين على ماتدرك إنك فى الحقيقة كنت موهوم إنك فاهم ومقّدر ولكنك فى الحقيقة ماكنتش فاهم أى حاجة
زيى دلوقتى بالنسبة لذنب عملته زمااااااان .. ولسة يادوب بندم عليه ندم حقيقى ، ندم يلائم إدراكه
أتمنى فعلا أعرف ازاى أكفّر عنه حتى وإن كنت عملته قبل مرحلة التكليف بس لعلّى أبطل ندم ورغبة فى الرجوع بالماضى لتلافيه

المشكلة الأكبر مش الذنب ده على أد الذنوب الكتير اللى عملتها بعده واللى كتير منها مش مدركة حجمها إلى الآن واللى مش ممكن همثل ندم مبالغ عنها من غير ما أحس بقدرها .. همثل على ربنا ازاى !!

مآساة حقيقية .. إزاى تستغفر لذنب استغفار يليق بحجمه إذا كنت لم تدرك معناه بعد !
وهل سيمتد بك الوقت لتدرك معناه فتستغفر له كما ينبغى آملا فى العفو !
وإذا امتد بك الوقت .. هل ستتذكر جميع ذنوبك وهل سيتسع عمرك لها !

معتقدة حالياً بما يقترب إلى اليقين إن إدراك الذنب هو جزء من إحياء القلوب
كل ما القلوب ضلّمت .. كل ماصعب عليها إدراك الذنب فى وقته 

المنبهات

من وإحنا صغيرين -أنا وأخواتى - بابا وماما كانوا دايماً يقولولنا اوعوا تشربوا شاى , الشاى بيصّغر :D 
وبما إننا عاوزين نكبر مش نصغر .. فعمرنا ماقربنا للشاى ولا أى حد من أخواته طبعاً 

وبما إننا ما اتعودناش نشربه .. فالموضوع مش فارق معانا خالص , حتى افتكر إنى جيت أجربه مرة حسيته مر جداا وماكررتهاش تانى واستغربت الناس اللى بتشربه كتير فى اليوم الواحد .. زى بابا مثلا ! 

كنت متخيلة إن فيه ناس كتير زيينا ... وعادى زيه زى مشروبات كتير ناس بتحبها وناس لأ
بس اكتشفت إن الشاى حاجة تانية فى البيوت المصرية ... 
كنا لما نروح زيارة لحد من قرايبنا أو معارفنا ويجى وقت الشاى ويعملولنا من غير سؤال أصلا لأن مين مابيشربش شاى يعنى عشان يسألوا !!  ويتفاجئوا بقا إننا مابنشربش شاى فى نفس الوقت اللى بابا بيشرب منه كميات رهيبة O_o 
ولازم نحكيلهم طبعا قصة الشاى اللى بيصّغر :D

القاعدة دى فضلت سارية لحد سنة واحدة فاتت 
لما سافرت لأول مرة معسكر وقعدت 5 أيام بره البيت .. وكان فيه كل يوم شاى ع الفطار 
شربته لأول مرة فى حياتى .. والغريب إنى بقيت كل يوم الصبح استناه ,, لأن ده المشروب الوحيد المسموح بيه هناك أصلا ومرة واحدة بس .. ع الفطار ! 
كان بالنسبالى الحاجة الوحيدة اللى بستناها فى المعسكر ده .. وكنت مستغربانى جدااا وفى نفس الوقت مستمتعة بالتجربة الجديدة :D

لما رجعت البيت وحاولت أشربه مره الصبح .. على اعتبار انه أصبح عادة كانت مأساه :D 
الموضوع قلب معايا بمغص وvomiting وأعراض عجيبة ولذلك رجعت القاعدة القديمة .. مفيش شاى -_- 

السنادى بقا جربت حاجة تانية بسبب ظروف الصحيان والنوم الغريبة .. القهوة 
والغريب إنها بقت روتين يومى قبل الراوند ويمكن شجعنى إن صديقتى الصدوقة هى كمان بدأت تشربها ولو ماشربتش فى البيت بنروح سوا نشترى من الكافتيريا ,, وقعت فى حبها فى وقت قياسى :D

روحت معسكر تانى السنادى وكان أساسى طبعا الشاى ع الفطار كالعادة بس وقت المعسكر وفقط ,, 
بعد المعسكر التالت بقا كان الشاى مش الحاجة الغريبة أوى عليا وبدأت أشربه فى البيت فعلا 
الموضوع جديد عليا حتى الآن وماحدش لسة اكتشفه فى البيت :D 

بعد 25 سنة من العمر ... بقيت أشرب شاى وكمان قهوة !!
على رأى أختى : شربتى بانجو ولا لسة يا سعدية :P

الأقلام الجديدة

بحب أوى اشترى أقلام جديدة .. وياسلام لو ملونة ^___^ 
شراها , وجودها على مكتبى , الكتابة بيها.. 
متعة بسيطة جدااا بس عظيمة جدااا 

النهاردة اشتريت قلم من ضمن مجموعة أقلام والمفاجأة لما روّحت البيت واكتشفت إنه قلمين فى بعض بلونين مختلفين ^____^