ماسك الهوا ..

تدوينة كئيبة جدااا .. لو حد وصلها بالغلط مايقراهاش
الكلام اللى مش هقوله فى أى حتة لأنى مابحبش أكون الشخص المحبًط أو المحبِط  .. 

امبارح فتحت الراديو وكان عبد الحليم بيغنى ماسك الهوا .. وعشان أنا أصبحت من الناس اللى عندهم قابلية غير عادية للإكتئاب إكتئبت

فعلياً أنا ((ماسك الهوا )) بس الهوا الفعلى مش المجازى اللى حليم يقصده
حاليا عندى 23 سنة وفاضلى تقريبا 5 شهور فى كلية طب وأنهيها تماما .. بعد 6 سنين كاملين ودى أطول مدة لأى كلية
ومع ذلك مافيش أى حاجة ماسكاها بإيدى ..

الدراسة عبارة عن أكبر كمية هوا أنا ماسكاها ,, ماعنديش معلومة طبية واحدة يمكن كويسة ,, والأسوأ إنى ماعنديش شغف أو فضول أو غموض عاوزة أكشفه بدراستى للطب .. ماعنديش حاجة أحارب عشان أوصلها وبالتالى مش فارق معايا حاجة
آه بحب مواضيع الطب ومعتبراها شيقة جدااا .. بس ماعنديش فضول , ماعنديش هدف أذاكر وأعمل حسابه !!!

الثقافة !! هوا برده
كمية الكتب اللى قريتها فى خلال 6 سنين - المدة الفعلية للإطلاع بالنسبالى بما إن قبل كدا كان كله مذاكرة فى سبيل القمةالوهمية عند كل الآباء والأمهات !! - واللى فى نظر ناس كتير يعرفونى هى كمية مهولة
فهى فى الحقيقة ولا حاجة .. الـ ولا حاجة فى أسمى معانيها
ومع إن فيه كتب بتدخلنى فى حالة إيفوريا رهيبة .. بس مابحسش إنى بعشق الكتب زى عشق ناس كتير ليها , مابتتفننش فى وصفها ومابقولش فيها أشعار ,, ومابحسش بالسحر الخاص اللى المثقفين بيتكلموا عنه ناحية الكتب !
علاقتى بالكتب علاقة متقطعة .. أوقات بأقبل عليها جداا وأوقات بسيبها خالص
ممكن فترة طويلة تعدّى من غير ما أفتح كتاب أو رواية أقرأها .. وبالتالى مش عشقى ومش شغفى
بقرأ لأن القراءة ضرورية مش لأنها حياتى

العلاقات !! أهو ده أكتر هوا مدخلنّى فى الحالة دى
من أول مادخلت الكلية وأنا اتوهمت إنى هطلع من الكلية دى بالعلاقات اللى عملتها , سواء أصدقاء , دكاترة , زمايل اشتغلت معاهم !
بس اكتشفت ان كله وقتى .. هنعرف بعض يمكن سنة , سنتين بعد الكلية وبعدين خلاص كلها ذكريات !
وفيه من العلاقات دى اللى انتهى فعلياً وقبل ما أخلص الكلية
وهم كبييييير عيّشت نفسى فيه لإنى محتاجاه مش لأنه موجود فعلاً !
كنت فى سنة أولى عندى قدرة عجيبة فى التعرف على الناس والانفتاح عليهم ومصاحبتهم
حالياً الموضوع ده أصبح عبء وتوجس من الشخص الجديد ده !
بقيت بخاف تكوين علاقات جديدة مع إنى لسة مابدأتش حياتى !
دايما معتقدة إنى علاقات كويسة يعنى نجاح فى مجال شغلك ,, ومن أول مادخلت الكلية بدأت أدّرب نفسى على المهارة دى
بس أنا لسة مابدأتش شغل وإستنزفت قدرتى على معرفة ناس جديدة !!!


المستقبل بقا والتفكير فيه .. إكتئاب بشكل تانى
يمكن الجزء الخاص بيه هنا .. إنى ماعملتش حاجة تخلينى أوصل للحياة اللى بتمناها لنفسى على المستوى الشخصى على الأقل !
كلها أحلام بدون خطط , بدون أساس  !
وبالتالى التفكير فى الجانب ده بقا عبارة إنى بتخيل حياتى هى الحياة الروتينية المملة بنفس الأفكار اللى مابطلناش ننتقدها فى الجيل القديم وماقبله وماقبله
بمعنى تانى .. قدرتى على التعامل مع المستقبل بدون الأساس اللى مابنيتوش ده .. هتبقى بالوراثة
وبالتالى نفس الحياة , نفس المفاهيم , نفس كل حاجة رفضتها وتخيّلت إنى هغيّرها فى حياتى

يمكن الدخول فى الدايرة دى نفسها مش هيجيب إكتئاب لأنك مش هتدرك ساعتها إن فيك حاجة غلط ! أو إنك اتحولت بشكل أتوماتيكى للصورة اللى كنت رافضها ,,
إنما إنك تبقى عارف من بدرى إنك هتدخلها وتتحول للشخص اللى إنت رافضه .. هو ده مصدر الإكتئاب !

الأسوأ من ادراك إنى (ماسكة الهوا ) ,, هو
إنى مش حاسة إنى عندى طاقة إنى أمسك حاجة غيره !


بقول كفاية أوى الجرعة دى من الإكتئاب .. عوّضت بيها الفترة الطويلة اللى ماكتبتش فيها -_-

أنا والتدوين

أنا بحب التدوين جداا فى كل صوره وأشكاله 
يعنى المدونة دى أحب مكان ليا على النت .. الركن البعيد الهادى على رأى أنغام
بعيد جداا عن دوشة الحياة كلها وكل مشاكلها وكل الخناقات والنقاشات الجد والهزار اللى مابنخلصش منها .. 
مع إنى بحب النقاشات جداا والحوارات مع أصحابى والاختلاف معايا ,, بس هنا المكان اللى بكتب فيه الكلام اللى مش عاوزة حد يناقشنى فيه ,, مش دايما بيبقى كلام صح بس أهو رأيى وفكرتى ومافرضتهاش على حد ولا نشرتها فى مكان هيأثر على رأي حد 
مكانى اللى مش مسموح لحد مهما كانت مكانته إنه يفسده عليا 
ولذلك مابحبش أنشرها أصلا 
****
من قبل المدونة ولحد دلوقتى بحب أشترى النوتات جدااا .. وبنبهر بأى نوتة شكلها جديد ومعمولة بشكل محترم , مش أى شوية ورق متجمعين مع بعض وخلاص
بحب النوتات بكل أحجامها وأشكالها ,, وبشترى منها كتيييير جدااااا 
وبكتب فيهم برده ,, اكتشفت انى بكتب فى 3 نوتات مختلفة فى وقت واحد , مع ان يمكن الكلام مش مختلف عن بعضه أوى ,, 
بس كل حاجة ببقى عاوزة اكتبها بتجيب النوتة اللى تحب تتكتب فيها ^_^

****
الـ sticky notes بقا عشق مستقل بذاته 
مع إن أسعارها فى مصر مبالغ فيها جدااا , بس لازم أى مكتبة أدخلها أقف عند الركن ده أتفرج عليهم وبضعف فعلا قدامهم خوصاً الملونة ^__^ 
انى الاقيهم موجودين فى المكتبة أصلا بكميات كبيرة بيمثلى بهجة غير عادية .. اللى هو أمان لو خلصت اللى عندى فى البيت هلاقى غيرهم :D 
بحبها جداا وبحب أكتب فيها أى خاطرة أو بيت شعر أو أى حاجة مالهاش أى معنى إلا عندى أنا ,, وبعلقها على حيطان أوضتى  :)

****
ده غير بقا الفيس والبوستات الغير منتهية اللى عليه 

**** 

تدوينى لا يخص حد غيرى مش مطلوب تأييد أو رفض ولا أى مناهدة من أى نوع 
وعشان كدا معظمه فى أماكن بعيد عن عيون الناس عن كل العيوووون على رأى حليم المرادى :P :D

المكان الوحيد اللى المناهدة مفتوحة فيه هو الفيس .. وده كفاية أوى :D


ولذلك أى كلام يتكتب هنا وأى حد يقراه بالغلط :D :
عجبه خير وبركة
ماعجبهوش يكمل حياته عادى خالص ومايلتفتش ليا أصلا , 
أنا أصلا مش كاتباه عشان حد يقراه ,, ده كله كلام فارغ 
وهذا اعتراف منى بذلك :) 

منعزل

فيه أوقات ممكن تبقى ناقم على كل حاجة حواليك
طهقان وزهقان وشايف كل تصرف غلط بسيط  بقوة تكبير مليون مرة
بتبقى شايف كل حاجة حواليك غلط فى غلط

الأوقات اللى زى دى بتبقى نعمة كبيرة جدااا لو قدرت تكتم كل ده جواك وتسكت
ولو ماحدش فى اللى حواليك خرجك عن صمتك ده

ساعتها هتعدى على خير وهتنساها
إنما لو اتكلمت هتقول كلام غبى وهتندم عليه بعدين وعلى حسب هو جه فى مين قدامك ياترى هينساه ولا لأ


ياريت لو يبقى فيه اشارة كدا الكل يفهمها فى الوقت ده انك حاليا #منعزل
عشان ماحدش يكلمك أو يستغرب فترة انعزالك دى