وَمَا لأحَدٍ عِنْدَهُ مِنْ نِعْمَةٍ تُجْزَى * إِلا ابْتِغَاءَ وَجْهِ رَبِّهِ الأعْلَى * وَلَسَوْفَ يَرْضَى

even if black ..

الدنيا بالنسبالى قهوة سادة ماتتشربش 

, 

بس فيها شوية ناس ومواقف وأحداث هما السكر اللى بيحلّيها ويخليها مظبوطة وتعدل الدماغ

,

بس الغريب إن الحلاوة دى لو زادت هتبقى مايعة بزيادة وبرده ماتتشربش

كتر الحلاوة فى الدنيادى مش حاجة حلوة .. أبداً 

لازم تبقى كدا وكدا عشان تبقى موزونة ومظبوطة وأعرف أحس بالحلو لما أقابله وأقول الحمد لله

I enjoy my coffee even if black

I enjoy my life especially if hard 

:)

يوم توزيع البهجة :)

النهاردة أخيراً جبنا الفوانيس اللى عملناها أنا وصحبتى ووزعناها على الراوند كله .. 
وكمان العاملة بتاعت متحف النسا خدت فوانيس لبنوتاتها الاتنين .. وواحد ليها هى كمان :D 
هى سنها صغير يمكن أدنا أو أصغر كمان :D .. بس قالتلنا :بجد أنا فرحانة أوى أوى وخلتنا نكتبلها على ضهر الفوانيس ^_^
وطلعت بره فى المتحف وقالت ياجماعة خدوا الآلات اللى انتو عاوزينها , اللى له غياب قديم ماخدوش يجى ياخده .. المتحف بتاعكم :D 
وأصحابنا اللى رجعوا أكتر من مرة عشان محتارين ياخدوا أنهو لون وأنهو شكل :D .. نهييين نهووون :P 
واللى خدوا من كل شكل واحد .. أهو رخامة كداهون :P 

ماكنتش متخيلة إن حاجة بسيطة أوى زى دى ممكن تفرحهم بالشكل ده !

بس بما إن الحلو مابيكملش .. كل أصحابنا من خارج الراوند زعلوا إننا ماعملناش حسابهم O__o
إحنا كدا محتاجين شهر نقعد نعمل فوانيس بس عشان نكفى الحبايب :D 

فيه أبناء هيفضلوا طول عمرهم ممتنين جدا لوالدهم إنه إختار والدتهم 
وكذلك ممتنين لوالدتهم إنها إختارت والدهم 

لما تكون الأم سيدة فاضلة , سيرتها طيبة , حسنة الخلق والكلام والفكر .. لازم تشكر والدك عليها وتفضل تدعيله طول عمرك 
وكذلك لو الأب إنسان فاضل , حسن السمعة والعلم والخّلق .. فيه من سمات رسول الله فى بيته ومعاملته لأبناءه وزوجته .. لازم برده تفضل تشكر والدتك عليه ماحييت وتدعيلها على حسن إختيارها .

لما الواحد بيختار زوجة .. مش المفروض يفّكر فى نفسه وبس , المفروض يفّكر فى أولاده كمان 

هل دى الأم اللى يتمناها لولاده !! هل أولاده هيدعوله بقية حياتهم على هذه الأم !! هل هى الأم اللى أولاده ممن يفتخروا بيها ويفتخر هو بتربيتها لولادها !! 

وكذلك البنت وهى بتختار زوجها .. مش بس تفكر فى مميزاته كزوج وإنما كأب 
هل ده الأب اللى هيعلم ويرّبى أولادها صح ؟؟ هل ده الأب اللى هيحسن معاشرتها وهيحسن معاملة أولاده وبالتالى هينشأوا في بيت حسن الخلق فيشبُوا أسوياء نفسياً وخلُقياً ؟؟

أنا واحدة من الناس اللى بتحترم والديها جدااا (بعيداً عن الإحترام الأبوى المفروض ) وإنما إحترام استحقاقى .. على حسن إختيارهم لبعض :) 

ربنا يخليهم لينا ويرزقهم بالجنة يارب 

مواقع السوشيال ميديا خليتنا نتهاون فى حاجات كتير .. كتير أوى
وبدل ماننّبه بعض للغلط بقينا بنشجع بعض عليه على أساس إنه هزار وإن كل الناس بتعمل كدا وطبعاً ماقصدناش أى حاجة وحشة !

كمنانا ^_^

أحلام مالهاش علاقة ببعض .. 

نفسى أصلّى التراويح فى الحرم .

نفسى أوزع إفطار فى رمضان على الطريق .

نفسى ألاقى طريقة ما أخليش حد يدفعلى فى المواصلات من غير إحراج لا ليه ولا ليا .

نفسى أعمل فرق فى الكلية قبل ما أسيبها .

نفسى أدخل فى تحّدى جديد فى شغل .. يرجعلى الشغف والحماس من تانى.

نفسى ما ألاقيش بنت حزينة لأنها حاسة إنها وحشة.

نفسى أصحى فى يوم ألاقينى بعمل كل حاجة نفسى أعملها مش الحاجة اللى اتعودت أعملها .

نفسى الولاد يبطلوا يدّوا وعود هما مش أدها .. ومش هينفذوها .


نفسى كل واحدة من صحباتى تحقق الحياة اللى نفسها فيها .

نفسى أقول "لأ" فى الوقت اللى ببقى عاوزة أقول فيه لأ خصوصا للناس اللى يفرقوا معايا .. وأنا متأكدة إنهم هيتفهّموا إن ده من حقى ومش من حقهم يزعلوا ! 

نفسى الأمهات يبطلوا يردوا على بناتهم مع كل طلب يطلبوه (( لما تتجوزى إبقى إعملى اللى إنتى عاوزاه )) .

نفسى كل واحد يفهم يعنى إيه إلتزام .. وإن الكلمة اللى بتتقال إلتزام .

نفسى بداية يومى دايما تكون مع الفجر .

نفسى ألبس الشابوه فى الشارع من غير ما أخاف من الكلام السخيف اللى ممكن أسمعه.


نفسى عمرى ما أستنى مدح من حد على شغلى عشان أحس إنه كويس .. وأبقى متأكدة إن أى مدح هو حقيقة مش مجاملة.

نفسى ثقتى فى شغلى تفضل زى ماهى أو تزيد .

نفسى فى بلكونة أملاها زرع وتكون شرقية عشان الشمس تصبّح عليا كل يوم عن طريقها.


نفسى ألاقى شرح يوصلنى فى مادة النسا لإحساس الـ euphoria اللى مايتوصفش وأنا بسمعه أو بقرأ تفريغاته زى أبو الأسرار .

نفسى البيت يبقى مشاركة فعلية .. وكل زوجة أو أم ماتُستهلكش للدرجة اللى توصلها للـ 80 من عمرها وهى لسة فى الـ 40 ! 

نفسى ما أعملش أى حاجة فى حياتى تقضية واجب وخلاص .. خاصة فى الشغل . 

نفسى حياتى ماتتحولش إن 3/4ـها عبارة عن طبيخ ومواعين وهدوم بتتغسل وتتطبق وتتكوى ! 

نفسى ما أحسش فى يوم إن حد أو حاجة سرقتنى منى . 

نفسى أفضل آخد بالى من التفاصيل الصغيرة المبهجة .. وأبتهج بالتفاصيل الصغيرة .

نفسى أحضر حفلة باليه فى الأوبرا ^_^ .

نفسى ما أكبرش .. ولا أسمح لحد فى يوم من الأيام يحسسنى إنى كبرت .


نفسى أحقق كل اللى فى استطاعتى .. وهحققه إن شاء الله بما إنى بحلم وأنا مفتّحة مش وأنا نايمة ^_^ 
والباقى مش هبطل أدعى ربنا يرزقنى بيه :)

الدرج بتاعى بقا عبارة عن مخزن للفيونكات والفوانيس  

اللى لسة ماوصلتش لأصحابها

^__^

أخوة يوسف

فى تفسير سورة يوسف للشيخ الشعراوى كان فيه معنى رااائع 
كان بيقول وصف كدا لإخوة يوسف بس مش فاكراه بالظبط معناه إن إوعوا تفتكروا إن أخوة يوسف عشان اللى عملوه فى سيدنا يوسف يبقى داخلهم سىء وإنهم من الأشرار .. هو كان جواهم ضعف بس لما عملوا كدا وإنما ربنا كان بيكيد لسيدنا يوسف من خلالهم عشان يوصل للمكانة اللى وصلّها وعلشان تحقيق الرؤية اللى شافها وهو صغير 

سبحان الله .. المعنى ده بالنسبالى كنز لا يقدّر بثمن 
يعنى خططوا عشان يتخلصوا من أخوهم ونّفذوا ورجعوا كمان لأبوهم وما اعترفوش باللى عملوه وسابوه عينه تبيّض من البكاء ومع ذلك مايتقالش إنهم أشرار !!
فى تفسيرها قال الشيخ الشعراوى إن الشخص اللى داخله سىء بيعلى فى الشر .. يعنى لو متخانق مع حد يقول هشتمه ثم هضربه ثم هموّته 
إنما اللى داخله خير بيزل فى الشر .. يعنى لو متخانق يقول هموّته ثم هضربه ثم هشتمه 
هو فى طريقه للعفو .. فى طريقه للرجوع للحق 
بس هو ضعف 

سبحان الله ع المعنى 
حاجة كدا تدّيك أمل فى نفسك 
مهما عملت فى حياتك أو أخطأت وفكّرت إنك وصلت لقمة الشر أو الذنب ,, لا تيأس من رحمة ربنا وعفوه .. 
عفو ربنا علينا ليه تفاسير كتير جداا لا نعلمها , لانعلم حتى طريقة رؤيته لينا ولأخطاءنا


يارب ذنوبنا تفضل صغيرة ونفضل عندك طيبين ♥