من يومين جاتلى نبتة لافندر هدية 
من أحلى الهدايا اللى جاتلى فى حياتى ^__^ 

أحلى مافى الموضوع إن المتعارف عليه البوكيهات .. اللى انا مابقتنعش بيها 

إنما ده أصيص زرع ^__________^ 
أول ماشفته .. جه على بالى حاجة كنت هكتبها عن الزرع وأهمية إنتشاره كهدايا بدل البوكيهات واتبسطت أوى إنه جالى قبل ما أكتب الكلام ده, 


وكمان لافندر !! .. ده إيه الدلع ده ^_^

طيب والله العظيم البنات دول هبل وغلابة أوى 
كلمة تخليهم ينفطروا من العياط ,, وكلمة بعدها على طول تخليهم يضحكوا ويقعدوا يحبّوا فيك :) 


أنا نفسى افهم أصحابى مستحملينى ليه بعد كل اللى بعمله فيهم ده !!

وبيجى عليك وقت من الأوقات بتتصدم فى ناس كنت مبهور بيهم ,, 

وبتتصدم فى سذاجتك للمرة المليون عشان لسة بتنبهر بأى حد لمجرد حاجة كويسة فيه -_-

الرحلة ..

- أصحابى نفسهم من زمان يطلعوا اسكندرية 
- خلاص يلا نطلع .. 
- اليوم اللى قبلها على طول كله أحداث وأخبار غريبة .. يبقى أكيد الرحلة هتتلغى :D ! 
- الرحلة مابتتلغيش بس مش حاسة إنى طالعة رحلة .. عااااااادى 
- الصحيان بدرى وبهدلة أصحابى عشان اتأخروا عن معادنا 5 دقايق :D 
- الوصول لمكان التجمع أول ناس وبهدلة الباقيين على مواعيدهم البايظة :@ 
- الاتوبيس والناس الحلوة والصور والشابوه اللى لحقت اتصور بيه قبل مايتقطع ^_^ 
- لعبة الأفلام والتمثيل اللى بيقلب لصلاة وعبادة :D
- نفحات أسماء اللى لا يمكن تنساها فى أى تجمع , ومصاصات جهاد ^_^ 
- الهجرة والكلام عن الهجرة وتسخينى عشان أقوم أرد :D ! 
-الوصول لإسكندرية وافتراقنا عند المكتبة 
-البحر والجو و.. هيييييييييييه :D 
- المكتبة وروعتها وذكريات آخر مرة دخلتها 
- متحف شادى عبد السلام ومتحف المخطوطات وانبهارى بيهم ♥
- المرشدة العسولة اللى كانت معانا فى الجولة ^_^
- الخروج من المكتبة والقاعدة على البحر .. ويا ' شط اسكندرية ياشط الهوى ' 
- مسجد القائد إبراهيم والحديقة العامة اللى مش عارفين بيتدخلها منين :D , يلا ننط من ع السور !! ثم إيه ده .. ده الباب مفتوح :D
- فدائيين الأطفال اللى خلصوا امتحان وحصلونا على هناك ^_____^ 
- كبدة الفلاح والسيلفى والكلام عن الامارات :D 
- شعبان اللى بيقولوا عليه والمشى نص ساعة لحد ماوصلنا ثم ساعة تانية واقفين فى البرد لحد ما مكان يفضى.. 
- اكل السمك بره البيت لأول مرة :D
- القطط والهسهس اللى عند الهديرتان والروشة اللى اتروشناها واحنا قاعدين :D 
- كفر التاب اللى مش لاقياه حتى فى اسكندرية O_o 
-رحلة الرجوع للباص وركوب الحنطور والمشى فى عز البرد والليــــــــــــــــــــــل ♥ 
- الحصار فى ملتقى الترام ـان :D
- سلــــــــــــــــــــــــــــــــــــــــــوى ♥ ♥ ♥ 
- كوبرى استانلى والمشى فى عز البرد والجو الفوق رائع ,, وأنا مش سقعااااااااان .. أنا  فرحان ^_______^ 
- الصورة اللى لو بتتاخد على بعد 50 متر منك هتجرى عشان تلحقها قبل ماتتلقط :D 
- المشى رايح جاى والحوارات الكتير اللى ماتعرفش ايه اللى جابها هنا :D ! 
- الصور والصحبة وغزل البنات وعربية البطاطا وماتيجو نشرب شاى بالنعناع .. بس الاتوبيس وصل :D 
- كارفور و 5 ساعات بنفكر هنعمل ايه فى الساعتين اللى المفروض الناس هتدخلهم سينما :D , ندخل مش داخلين , خلاص ندخل , خلاص مش هندخل , خلاص هندخل ,طيب والله ما احنا داخلين :D
-التورتة وحيّوا أبو الفصاد واللى هو المفروض لما اتفاجىء الريكأشن الطبيعى بيبقى ازاى !! :O
- الانشكاح الفوق فظيع اللى باين فى كل الصور ^_^ 
- الصور الـ fake بعد تقطيع التورتة :P 
- معاد السنيما .. وانطلاقنا على باب الله مش عارفين هنروح فين فعلياً :D 
- التفكير واحنا خارجين ياترى كل واحد معاه بطاقته !! وأنا معايا دبوس الفريق ينفع :D ! , وياترى لو وصلهم اننا اتقبض علينا تحرّى وهما فى السينما هيعملوا ايه :D
- القاعدة فى الشارع على الرصيف , واللب , وعرفنى بنفسك اللى قلبت كلها رتب :D 
- خلصنا من هسهس القطط , طلعلنا هسهس الكلاب .. سمر عندها فوبيا من الكلاب 
- المشى بغير هدى على أمل نلاقى كافيه فاتح ,, والمشى على النجيلة اللى اكتشفنا فى نصها إن كلها مية :D 
- الوصول بسلام لـ بلبع .. وبداية فقرة التهييس اللى على أصوله :D
- قهوة وريأكشن هو فين الوش :D , وبرطمان اللمون بالنعناع :D , ونسكافيه شبه العصير , ولسان عصافير وحاجات تانية كتير :D 
- الهزار اللى كان هيضيع اتنين منى :D ..
- الصورة اللى عاوزين ناخدها واحنا قاعدين وياترى مين يصورنا .. وشوية دخلت عروسة وأهلها وايه رأيكم نناديلها تصورنا :P ! 
- منتهى العمق والسطحية فى نفس ذات اللحظة
-العودة للأتوبيس واللقاء من تانى .. وقفل النور عشان الناس هتنام -_- 
- هيبرة العودة الطبيعية جدااااااا والمتوقعة فى كل رحلة , والضحك اللى بيصّحى الناس وياترى بيشتموا فى سرهم ولا بيدعوا ولا ايه :P 
- التخطيط .. هنعمل إيه باقى اليوم , طنطا ولا راس البر :DDD 
- عاوزين تروّحوا ؟ لأ خلاص نكمل ع المنصورة 
- القاعدة قدام الكلية والهيبرة لتانى مرة وبشكل مختلف
- المشى على النهر (الخالد) واللب ومنتهى الروقان .. والناس لسة ماصحيتش اساسا :D 
- البرنامج اللى كنا هنعمله فى اسكندرية واللى ممكن يتنفذ عادى جدا فى المنصورة :D
-آخر سيلفى والقرار بإنهاء اليوم  .. على وعد بإستكماله قريب جدااا :)
- الصور تانى يوم وفتحها كل شوية عشان البهجة ^_^ 

*******  

مش بالمكان على أد ماهى الصحبة بجد :) 

#إسكندرية_نيو_إرا ^_^

الناس الحلوة فى الدنيا دى رزق أصلا :)

وكتير بسأل نفسى 

ياترى ربنا بيحبنى للدرجة اللى تخلّى الناس الحلوة اللى انا اعرفهم دول كلهم جزء من حياتى ؟؟

طيب يا هل ترى أنا كويسة للدرجة اللى تخلّينى أنا جزء من حياتهم ؟

ماما بتدعلينا دعوة حلوة أوى .. 

أول مرة سمعتها ضحكت وبعدين لما ركزت فيها لقيت معناها حلو أوى 

" ربنا يحبّب فيكم الحصى فى الأرض "

فجايز هى دعوة ماما .. أو أكيد هى دعوة ماما:D

إحنا أصلا ولا حاجة فى الدنيا من غير دعوات ماما :)

بس ماما أول الناس الحلوة اللى ربنا رزقنى بيهم أصلا ^_^
يبقى جايز فعلا ربنا بيحبنى .. 

إن شاء الله ربنا هيكون بيحبنى ♥ 

يــــــارب ..♥

صبراً

فيه محن لما بتسمع إن اللى حواليك عايشينها بتبقى مش عارف ترد تقولهم إيه !! 

الكلام فعلا سخيف جدا وساذج ولا يعبر عن شىء من اللى جواك مهما كان ..

تعرف إيه إنت عن الصبر أصلا عشان تتكلم وتصّبرهم ؟!

أنا حاسة والله إن المحن فى الدنيا دى أرزاق .. آه أرزاق
كل ماربنا شاف إنك هتصبر وتشكر رزقك بمحنة عشان يجازيك عليها خير
تخيل يعنى إيه تكون فى عز المحنة والضيق وعارف إن ربنا مصطفيك
وإن ربنا هيكون معاك ..وَاصْبِرُوا إِنَّ اللَّهَ مَعَ الصَّابِرِينَ
تخيل يعنى إيه تكون المحنة .. منحة !!

سبحان من صبّر أصحاب كل محنة

‫#‏وَبَشِّرِ_الصَّابِرِينَ‬
‫#‏اللهم_صبراً_وجبراً‬

الورد .. !

الورد .. !
علاقتى بالورد علاقة غريبة شوية ومش مفهومة .. بالنسبة للناس يعنى :D 
مابعتقدش ولا بنبهر ببوكيهات الورد كهدية .. يمكن سبب من ضمن الأسباب إنه بقا كليشيه 
الناس مابقتش بتجيب ورد عشان اللى هتقدمهوله بيحبه , وإنما عشان المفروض إن الورد هدية الانبهار ! 
ماعنديش مشكلة إن واحد يجيب لخطيبته ولا مراته ورد .. بس يكون عارف إنها بتحبه فعلا (هى ) مش البنات كلهم ولا المفروض تحبه ولا أى سيناريو بيتكرر قدامه , يجيبه عشان ( هى ) بتحبه مش عشان هو (ورد ) والطبيعى انه يتحب ! 
وماعنديش مانع برده إن خطيبته تتفاجىء وتفرح .. بس تكون فعلا مابتنبهرش لأن المفروض تنبهر وتبان كيوتة وعسولة ورومانسية ! 
فيه ريأكشنات مبالغ فيها أوى والمشكلة إن الهدية وتقديمها والريأكشن بعدها .. بقا سيناريو وبيتنّفذ بحذافيره 
وبالتالى فقد الورد معناه .. او الهدية عموماً أياً كانت 

ولذلك أنا مابحبش الورد 
مابحبش حد يجيبلى بوكيه ورد .. لأن كل الناس بقت بتجيب لبعضها ورد,, 
وأنا مش هنّفذ السيناريو اللى بشوفه كل يوم حتى لو فعلياً - فى عالم موازى - كان ممكن أحب الهدية دى جدا
بس فكرة إن حد يفكر فيا فيجيبلى هدية كليشيه لأنها الطبيعى مبهرة للكل (إنبهار كليشيه برده ) ..
يبقى مايعرفنيش وماتعبش نفسه يفكر شوية إيه اللى ممكن أحبه فعلا .. ( أنا ) مش البنات ولا الناس ولا بطلات الأفلام ! 
يمكن هى نرجسية .. أو أى مرض نفسى وعقد :D 
بس أهو أنا كدا :) 

**************
وعلى النقيض خالص جداااا
بفرح جدااااااااااااااااااااااااااااااااااااااااااااا لما الورد اللى زارعينه فى البيت يفّتح وماما تقطفهولى وتحطهولى على المكتب ^_^

والغريب إنى بحب الزرع جداااا والعناية بيه وبفرح جدااا كل ما يطلّع وردة جديدة أو فرع جديد :) 
ومتضايقة إن أوضتى مافيهاش بلكونة عشان أملاها فل وريحان ومسك الليل وجهنمية والحاجات الحلوة اللى بسمع عنها دى ♥ ♥ 

الزرع أصلا حياه وروح جديدة بتتولد بعد كل موت,
بداية جديدة دايماً بتأكدلك إن حتى لو الوردة دبلت هيطلعلك مكانها ورود

إنما بوكيه الورد .. لا يحتمل إلا نهاية واحدة إنه هيدبل ويموت -_- 

وعشان كدا أنا بحب الورد جدااااااا وبكرهه :D

اعمل أكتر

اضحك لغاية خدك ما يشقق
حب الحلم وعيشه وصدق
مسيره هيبقى حقيقة في يوم
انسى هموم الدنيا وقوم
لما تصدق حلمك تلاقيه اتحقق

اجري لحد ما رجلك ماتتعب
غير الخطة لحد ماتكسب
غني وغني وعلي الصوت
خش ف وش السد وفوت
لما تجيلك فرصه مش عيب تجرب

خلي الحلم اكبر اعمل اكتر واكتر 

اعمل اي حاجة في بالك من غير ماتفكر

ارسم وغير شكل الكون
العبلك ماتش وهاتلك جون
ارقص وسط اللمة وهيّس
انسى الهم تعيش كويس
اتشجع واجمد وانت تملك الكون

هاتي لنفسك حاجة جديدة
شوفي اللي يخليكي سعيدة
اعملي كل اللي يحلّيكي
مايهمش رأي الناس فيكي
خلي صوتك غنوة تتكلم عليكي

خلي الحلم اكبر اعمل اكتر واكتر
اعمل اي حاجة في بالك من غير ماتفكر

أكثر مما يتحمل

كل حاجة فى حياتنا مشيلنها أكتر مما تتحمل 
-الشباب متحمل من النقد على كل شىء بيفكر فيه وعاوز يعمله أكتر مما يتحمل للدرجة اللى تخليه ييأس من الحلم أصلا !
-الأهل متحملين من ولادهم نقد ولوم على حاجات مش قاصدينها أساسا !
-البلد متحملة من الشتيمة أكتر مما تستحق مع إننا جزء فاعل من الحاجات اللى بتتشتم عشانها
-التعليم محملينه حشو يقفل الدماغ ويضلمها مش ينوّرها !
-الجواز محملينه عقد وكلاكيع وقصص فاشلة تخّلى الشباب يهرب منه ويكرهه !
- الشغل محملينه نزاعات وحروب بتستهلك معظم الوقت والنتيجة مفيش إنتاج , مفيش إنجاز ! 


كل حاجة مكلكعنها ومعقدينا وبنستعملها استعمال غير بتاعها , أو بنفسّرها تفسير على مزاجنا ونشتمه -_-

حتى المشاعر من كتر تكرارها ,

من كترالكلام عنها .. باخت

دلع البنات

على الرغم من إنى بنت (المفروض يعنى :D ) 
إلا إنى مابطقش لا مياصة البنات ولا القمص بتاعهم ولا النحنحة الأوفر -_- 
وماعنديش المرارة اللى تخلينى أستحمل أى حاجة من دى 

ولما واحدة صاحبتى تتهبل وتتقمص وتكبّر موضوع مش مستاهل وشيطانها يوّزها تعيش الدور ده .. 
بقفل معاها لأنى فعلياً لو طوّلت ممكن أشتمها وهى ياعينى مستنيانى أصالحها :D

وأنا بشوف إن ده فى مصلحتهم
لازم أديهم shock عشان مايضيعوش منى :P 

إذا كان أنا مش طايقة نفسى اساسا عشان مرة اتهبلت وزعلت على حاجة تافهة والموضوع كانت تبعاته مش كويسة من كتر التفكير والتكبير اللى حصل فيه -_- ,, لو كانت صاحبتى ساعتها ادتنى الـ shock التمام .. كان زمانا لسة زى الفل :D 

فنصيحة :لما تلاقى دماغ بدأت تلسع , 
ماتتكلمش بالمنطق عشان مش هتتفهم بل على العكس هتكّبر الموضوع 
إدى مسكنات لحد ماربنا يهدى الدماغ دى تانى وترجع لرشدها بعدين ابقى اتكلم بالمنطق بقا :D
خصوصااااااا مع البنات (أكيد اللى مش المأفورين بطبعهم أصلا يعنى :P )

نص ونص

نص الكلام وزنه .. نص البكا حزنه
نص البيوت عمدان .. نص الطريق رملة
ملّونا فى الإملا .. الدنيا مش كاملة
الدنيا دى بوشين .. وكأنها عملة
الضحكة مش هى .. والدمعة أغنية
والحلم ليل بيموت .. مغرب وصبحية
 

مقسومة نص ونص .. وبتبكى وبترقص
بتحط إيد على عين .. وبتانى عين بتبص
 

نص الفرح صقفة .. نص الصحاب واقفة
نص الكلام حواديت .. نص الحياه إنتى
وانا وانتى حدوتة .. جدتنا ستوتة
تحكينا للأطفال .. كان ياما كان كنتى
أمى وساعات بنتى .. جرسى ومأذنتى
وريف وملو خضار .. وعمار يا مدينتى
 

مقسومة نص ونص .. وبتبكى وبترقص
بتحط إيد على عين .. وبتانى عين بتبص

كل الكلام سيرتك .. كل الحاجات صورتك
وان كنت اقدر اكون .. كان من زمان كونتك
نص البنات مساكين .. نص الهوى قضبان
كل البنات مساجين .. وانا مش هاكون سجان
والعشق حرية .. والبنت ثورية
والحضن صوته هتاف .. ولكل صوت غية
 

مقسومة نص ونص .. وبتبكى وبترقص
بتحط إيد على عين .. وبتانى عين بتبص

كلمات أحمد النجار 

فى دايرة الرحلة

فيه موقف بيحصل فى مجتمعنا كتير جدااا
وهو إنك تركب قطر مثلا أو عربية وتفتح حوار مع اللى جنبك .. وتفضلوا طول الطريق تتكلموا ولا أكنكم تعرفوا بعض من زمان 
بس أول ما العربية تقف وتنزلوا .. علاقتكم بتنتهى على كدا وكل واحد بيروح فى طريقه 
لا المفروض تتبادلوا أرقام تليفون ولا أكونتات فيس ,, ولا توعدوا بعض تتقابلوا تانى ولا أى التزامات من أى نوع 
ويمكن بتبقى أكبر غلطة لو حد حاول يعمل غير كدا فى الموقف ده .
 
حياتنا بقا بمختلف رحلاتها ومواصلاتها وعلاقاتها المؤقتة اللى مدتها رحلة أو معسكر أو إيفينت معين -علاقتك بالناس اللى فيه هتنتهى بمجرد ما الحدث ده ينتهى -المفروض نتعامل معاهم بنفس الأسلوب .
علاقتك بالناس دى مؤقتة ويمكن كانت حلوة جدااا فى وقتها .. بس بتبدّى تبّوخ وتسخّف بطول المدة اللى هى بتبقى عبارة عن شوية مجاملات من وقت للتانى على الفيس.

المشكلة إن الرتابة دى بتمحى معاها العلاقة والذكريات الكويسة اللى اتكونت فى المدة القصيرة اللى عرفتوا بعض فيها كويس 
ومابيفضلش من العلاقة الكويسة دى إلا شوية الملل والمجاملات الفارغة بتاعت الفيس .

يعنى لا استمريتوا على العلاقة الكويسة ولا حتى سيبتوها ذكرى كويسة ! 

عشان كدا أنا اقتنعت إن المفروض علاقتى المؤقتة ببعض الناس تنتهى بانتهاء الرحلة .. عشان أفضل فاكراهم على عهدهم الأول 
ولو قابلتهم صدفة بعد كدا فى أى وقت يبقى بنفس الإحساس الحلو اللى ودّعنا بعض بيه .

فجارى التنفيذ ...