إمسك فى الفرحة لما تجيلك ^_^

أنا فرحانة بدون وجود سبب واضح للفرحة دى :) 
وده يخلينى أتساءل ياهل ترى الأهم النتيجة هنا ولا السبب !! 
ماهو برخامتنا المعهودة فى المواقف دى بنسيب الشعور بالفرحة ونقعد نفكر .. هو ايه  اللى حصل يعنى عشان أفرح !! 

بطّل رخامة يارخم وإفرح ^___^

أناقة الشتاء

بحس إن الشتا أنيق طول ان مافيهوش شتا :D 

اللبس الشتوى .. البلاطى والجواكت والبوتات,,
الناس وهى ماشية بسرعة عاوزة توصل للبيت عشان تدفى ,, 
الإيدين وهما فى الجيوب أو جنب بعض بتحاول تدّفى نفسها,,

الشوارع فاضية من الناس اللى مالهاش شغلانة الا انها تبص ع الرايح والجاى وتعيب فى ده وتضايق فى ده 
كل واحد عمال ينفخ فى ايده عشان يدفى .. وبالتالى الكلام اللى مالوش لزمة بيقل


الاحساس بإن الناس مؤدبة ومحترمة (( حتى لو مش بمزاجها :) )) 
كل واحد مشغول بإنه يلملم نفسه من البرد .. وبس 

حاجات كتير تخلّينى أقول على الشتا انه أنيق وراقى :)

خليك على طبيعتك ..
لو حبّوك يبقى من حسن حظهم , ولو ماحبّوكش يبقى من حسن حظك :)

لماذا نصّر على أن نعيش حياتنا كـ مأساة برغم مافيها من وفرة من النعم !

don't let fear become your profession

............................

I can live without u but I can't live without myself 

 

..........................

 

 

ده إنت ولا حد تانى ؟

من كتر المؤثرات اللى حوالينا طبيعى جداا وبدون قصد نكون بنقّلد حد بنحبه 
يعنى مثلا اللى بيحب لّعيب كورة أوى بيحاول يبقى زيه على الأقل خالص فى الشكل ,, وفيه بقا اللى بيحاول يقّلده فى طريقة لعبه 

اللى بتعجب بممثلة معينة أو دكتورة أو شخصية عامة بتحاول تقلّدها فى لبسها مثلا أو لباقتها أو رقّتها أو بساطتها أو ثقافتها .... الخ

فيه حاجات من دى بنعملها بقصد .. إن النموذج ده عجبنا فبنحاول نكون زيه بالظبط 
وفيه حاجات تانية بتنطبع جوانا وبالتالى بتنطبع على اختياراتنا بدون وعى مننا , وبنفتكر اننا محددين شخصيتنا على مزاجنا بس فى الحقيقة احنا بنقلّد الشخصيات المتراكمة فى خيالنا دى 

يعنى مثلا .. 
فيه واحدة صحبتى من كتر حبها فى والدتها بقت نسخة طبق الأصل منها , فى كل حاجة 
حتى ان لما شفتلها صورة افتكرت انها مامتها مش هيا !!! حتى السن بان عليها انها كبيرة 
ويمكن هى -أو بيتهيألى فى الموقف ده تحديداً- ماكانتش قاصدة تقّلد مامتها أو تبان شكلها خالص 


كذلك طريقة لبس كتير من الناس 
ياترى هما بيلبسوا كدا عشان دى شخصيتهم فعلا ؟؟ ولا عشان هما حبّوا الاستايل ده على حد تانى فقلّدوه ((بما انه حلو )) 
هل احنا فعلاً اللى بنختار !! ولا خياراتنا بتبقى متحددة فعلا بدون وعى مننا على حسب الشخصيات اللى أعجبنا بيها على مدار حياتنا ! 

بحّس إن كل فترة إنت بتبقى متخيّل شكلك .. اللى هو شكل حد تانى 
يعنى وأنا صغيرة كنت شبه فيروز (الطفلة ) أو ممكن دلوقتى يقولوا منة 
لما أبقى فى الجامعة هبقى شبه فلانة جارتنا , أو فلانة الممثلة فى دورها فى فيلم كذا 
لما هكبر وأبقى مديرة هكون شبه الدكتورة بتاعتى 
أو ناظرة المدرسة وهكذا .... 

انت شايف حياتك كلها على ناس تانيين .. وده دليل قوى إنك بتقّلد شخصيات بتعجبك 


السؤال دلوقتى بقا .. 
ياترى ازاى الانسان يقدّر يفرّق بين ان دى حياته هوا واختياراته هوا ولا إنه عايش حياة أبطاله !!! 

وهل لو بعد فترة من الوقت الواحد اكتشف فجأة انه ماكانش عايش حياته وانما عاش حياة والده أو عاشت حياة والدتها - أو أيا كان الشخص اللى بيقلده - هل هيبقى مبسوطة بكدا ولا هيتضايق إنه ما عاشش حياته هو وطول الوقت كان فى دور مش بتاعه ؟؟!!