يوم غريب تانى :) :) 

النهاردة نزلت الكلية مخصوص عشان أحضر حفل خطوبة اتنين زمايلنا اللى قرروا يلبسوا الدبل جوا الكلية فى وسطنا ^_^
وطبعا على الرغم من ان عندى امتحان يوم الخميس ومش أى حاجة ده كوميونيتى ولسة ماذاكرتش .. بس برده ماينفعش أفوّت حاجة زى دى :D

وطبعا عشان أرضى ضميرى قلت هذاكر فى الكلية شوية لحد معاد الحفلة .. ولكن هيهات :D
لقيت فى وشى حفلة تانية .. (( عرفت عنها بالصدفة البحتة ))
وكل اما اقابل حد يقولى انتى ماطلعتيش ليه اطلعى يلا .. فاضطريت أطلع بقا :))

كنت ناوية أقعد 10 دقايق كدا وأمشى (( عشان أذاكر والله :D )) بس كل أما أجى أقوم واحدة صحبتى تحلف ما أنا ماشية 
والـ 10 دقايق اتحوّلوا لساعتين ونص :)) 
بس للأمانة يعنى أنا اتبسطت أوى بالقاعدة دى .. خصوصاً اننا اتطمنا على زميلنا الفلسطينى أحمد نزال اللى كان معتقل وخرج امبارح الحمد لله :) 

يادوبك خلصنا الحفلة دى .. نزلت لقيت الحفلة التانية يادوب بيجهزولها .. 
وبعد الأحضان والأغانى والزغاريط والصور .. لبسوا الدبل فى ساحة الكلية ^__^


طبعا ماذاكرتش حاجة واليوم خلاص ماعدتش ينفع فيه مذاكرة .. بس بجد اتبسطت أوى أوى النهاردة .. 
مش عشان حفلة وكدا وانما عشان حضورى النهاردة للحفلتين والجو اللى كان فيهم مسح حاجات ماكنتش عارفة أتخلص منها :) :) 


الحمد لله :)

بعد 4 سنين فى طب .. النهاردة أول مرة أدى حقنة "IM "

وكمان مش بمزاجى .. ده تحت ضغط والدتى .. 

الطب بهدلة O_o

مش عشان هدى حقن .. انما  عشان 4 سنين خدمة فى طب وبخاف أدى حقن :O

بنتعلم ايه فى الكلية !!! مش عارفة !

بحب صوت الكروان :) ♥ :)

أحياناً نتخذ قرارات لا نعلم صحتها من خطئها فنحن نجتهد قدر استطاعتنا لإتخاذ القرار الصحيح ولكننا لانعلم الغيب .. 

لذلك فإننا بعد كل قرار نتمنى فقط ألا نندم عليه فى المستقبل

امبارح ده كان يوم غريب جداااااااااا 

فى أوله ماكنش عندى طاقة أعمل أى حاجة مع ان المفروض كان عندى خطط كتير لليوم من أوله .. بس ماكانش نفسى أعمل حاجة 
نزلت الكلية بس عشان مواعدة أصحابىوموصياهم ينزلوا عشان نحضر اليوم الرياضى ..
مر الوقت لحد ماجه معاد اليوم الرياضى اللى المفروض مستنيينه من قبلها بشهر 
بس أنا خلصااااااااااانة ومش قادرة أفكر أصلا انى المفروض هروح وأتنطط .. ومع ذلك رحت 
والغريب انى أول ماشفت البنات زمايلى هناك.. انطلقت بقا وعملت اللى ماكنتش اتخيله 
جرى ولعب .. سلة وراكيت وركوب عجل وسباقات ووقوع وضحك ^___^ 
اتبسطت أوى يومها وأحلى حاجة انى كملت أنا وأصحابى اليوم وروحنا نتفرج على هدوم وجزم وشنط :D :D 

ولا أكن الوقت اتأخر ولا المفروض اننا هنسافر وممكن مانلاقيش مواصلات ولا أى حاااااااااااااااااجة 
ولولا الاتصالات الكتير اللى جاتلنا من البيت وقلقهم علينا .. كنا كملنا اليوم ومشينا على الكرنيش وكلنا ترمس وآيس كريم ^_^ 

بس معلش متعوضة :))

يمكنك أن تنسى إساءة تمت دون قصد من أحد أحبابك .. أو على الأقل يمكن غفرانها وتناسيها ,, 
ولكن كيف يمكنك أن تنسى أو أن تتجاهل تخاذل لم ينقطع يوماً ولم يؤخذ فى الحسبان !!

التخاذل هو الشعور الذى يأبى التلاشى من ذاكرتى هذه الأيام :( 

فى الاسبوع اللى المفروض أذاكر فيه كوميونيتى اخترت رواية الطنطورية عشان أقراها .... (( مع الكوميونيتى )) :O

وبعيدا عن المفارقات الغريبة بينهم وبعيداً عن أى حاجة
فالطنطورية لازم تفكرنى بديوان والصفوة وأحمد نزال ((زميلنا الفلسطينى )) اللى لسة معتقل حتى الأن :(
ولما اختار رواية بالحجم ده فى الوقت اللى المفروض أذاكر فيه .. لازم برده أفتكر "أيام الفضاوة " كلمة نزال المشهورة فى الوقت ده :)

ربنا يفك كربه يارب ويخرج على خير ويرجع لأهله ولدراسته فى أقرب وقت يارب

لما ضحكتك تتحبس جواك وماترضاش تخرج أبداً على وشك .. ومهما حاولت مش بتوافق ,,
غيّر عتبة .. يمكن ترجع تشرق تانى وتنوّر وشك ^__^

ماعاد القلب يحتمل الجراح لأنه قد تمزق تماماً

عدم الاختيار فى ذاته اختيار .. مقولة قرأتها ذات يوم وأعجبتنى
أعتقد لمصطفى محمود

وعرفت أن الكلام يميت المشاعر ولا يحيها .. 

فصدقاً " إن الحروف تموت حين تقال " 

النهاية !

رغم ان النهاية قد تنم عن اليأس إلا انها فى رأيى تجدد الأمل فى إمكانية خلق بدايات جديدة ..

وفيها ايه !!

وفيها ايه !!
لما أمشى لوحدى فى الشارع والجو برد وأنا مبتسمة :) 

فيها ايه ؟؟ مافيهاش أى حاجة .. وعشان كدا انا عملت كدا النهاردة ^_^

المسكنات دى نعمة من ربنا بجد .. 
ياترى حياة اناس قبل اكتشافها كانت عاملة ازاى ؟ مش قادرة أحط نفسى مكانهم 
اذا كان خمس دقايق مش مستحملاه وقمت خدت مسكن .. اومال هما كان ممكن يقعدوا بالكام يوم والكام اسبوع أو أكتر عايشين مع الالم ده ويمكن أسوأ ..

الحمد لله الحمد لله الحمد لله الحمد لله

أحلى 4 هدايا جولى فى عيد ميلادى هما ...
وشوكولاتاية كادبورى
شوكولاتاية جالاكسى ومعاها وردة سيمون جميييييييييييلة أوى :)
ومصاصاية ^__^

بجد فرحت أوى أوى أوى بالـ 3 هدايا دول ..

الكادبورى كانت من آيات حبيبة قلبى .. فرحت أوى انها وقفت الصبح مخصوص علشان تشتريهالى .. مع انها كان نفسها تجيبلى شوكولاتة محشية بس مالقيتش بقا :D
بس بجد فرّحتنى أوى أوى ... خصوصا انها كانت أو حاجة حلوة تحصل الصبح ^_^

الجالاكسى كانت من آمال ^_^ .. وفرحت أوى بيها أوى أوى برده وكمان بالورداية اللى قطفتهالى من جنينة الكلية :D
أنا عينتها فى الكشكول بتاعى لأنى بجد هزعل عليها أول لما تدبل :(

المصاصاية كانت من شمشونة بقا ^_^

أكتر حاجة صعبانة عليا إنى مش عاوزة أكلهم وعاوزة احتفظ بيهم بس هيبوظوا كدا ههههههههههههههه

الختام بقا فى اليوم ده كان الموووووووووووز .. آية قررت تحققلنا حلمنا وتشتريلنا موز ناكله فى الكلية :)) .. وتقريبا كل اصحابنا كلوا من الموز ده يومها :)

حاجات بسيطة آه .. بس أنا فرقت معاهم وافتكرونى .. ودى حاجة عندى بالدنيا كلها
ربنا يخليهم يارب ويفرحهم دايماً :)

يامن خلقت الدمع لطفاً منك بالباكى الحزين
بارك لعبدك فى الدموع فإنها نعم المعين !!

لما حد بتحبه أوى بيموت بتزعل منه أوى لأنه سابك لوحدك .. حتى مع انك عارف ومتأكد انه مش بمزاجه :(

مع انى مش من محبى ولا من مشجى برامج اكتشاف الاصوات الكتيييييييييييييير جدا اللى اكتسحت التليفزيون دى
بس كل فترة كدا أسمع حد بالصدفة ويعجبنى صوته أو يمكن الاغنية  اللى هو /هى بتغنيها


مرة سمعت مراد بوريكى .. وامبارح سمعت فرح "مش عارف ايه كدا " بتغنى اغنية مادام تحب بتنكر ليه
وفعلا صوتها كان رائع :)

بس برده أنا لسة عند موقفى .. البرامج دى رخمة جدا وانتشارها بالمستوى ده بيدى مؤشر سىء جدااااااا عن الوطن العربى :O

معاناة مريض لأنه طالب فى كلية طب :O

رحت للدكتور أقوله .. بص بقا يادكتور انت لازم تشوفلى حل
أنا كل شوية أخد علاج وأنتظم عليه وتيجى الامتحانات تبوظلى كل اللى عملته لأنى عمرى مارحت متابعة من المتابعات الكتير اللى كانت متحددالى لأن بيبقى ورايا امتحان يومها  :@

قالى خلاص خلصى امتحانات وابقى تعاليلى

ماهى مابتخلصش يادكتووووووووووووووووووووووووووور :((

النهاردة جاتلى أول هدية بمناسبة عيد ميلادى ^_^
أينعم هى جاية بدرى شوية بس كله عشان الامتحانات :)) 

فاتن دى هى أقدم صاحبة ليا لحد دلوقتى ومن ساعة ماعرفنا بعض واحنا بنجيب لبعض هدايا,
والهدايا تطورت طبعا مع مرور الزمن وكل مانعجّز كل ما الهدية تختلف :)) 

وبرده أوقات تقديم الهدايا بيختلف .. مش مرتبط بعيد الميلاد خالص O_o
أخر هديتها وديتهالها كان بعد عيد ميلادها بحوالى شهر لأن كان عندها امتحانات وبعدين انا بقا عندى امتحانات ولما جه وقت مناسب كان عدى شهر :O 
عشان كدا هى قررت تتفادى الموضوع ده وتجيبلى الهدية قبل ماتبدأ امتحانات اساسا ^_^

وطبعا لأنها هدية خاصة يلزمها تعامل خاص .. فقعدت بقا تشرحلى وتوضحلى المفاهيم الخاطئة اللى عندى .. وفعلا استفدت جداااااااااااااااااااا =)) 

فرحت أوى بالهدية وفرحت كمان بزيارتها وفرحت انها روّحت فرحانة لأن الهدية عجبتنى أوى :)) 

ربنا يخليها ليا يارب ونفضل نجيب لبعض هدايا لحد مانوصل لـ 100 سنة .. مع انى مش عارفة ايه الهدية اللى ممكن تنفع لحد عنده 100 سنة :))
يمكن طقم سنان  :)) :P

فى اوقات بتبعد فيها عن ربنا .. وبيبقى نفسك أوى فى الوقت ده انه مايبعدش عندك :(

تخيّل الدنيا لو مافيهاش حد يهوّن عليك بلاويها كانت هتبقى عاملة ازاى !!!

الأخوان المسلمين فى مصر أساءوا للإسلام أكتر من إساءتهم لأى شىء آخر .. للأسف!

حتى الآن عندى اعتقاد بل يقين أن "الموت من الأشياء التى يُسلّم بها الانسان ولكن لايمكنه ادراكها " 

تجده يتحدث عنه بمنطقية مطلقة وترتيب أحداث منظم وكأنه يفهمه ويعيه ولكن انظر اليه عندما يأخذ الموت أحد أحبابه .. ستجده من هول الصدمة نسى المنطق ونسى الأحداث وتكرر على لسانه .. كيف اختفى وأين ذهب ؟؟؟؟!!!

وفيات :(

أول خبر سمعته الصبح كان وفاة ولد فى اعدادى وهو راجع من الدرس فى حادثة 
وآخر خبر سمعته كان وفاة بنت فى أولى كلية وهى فى الكلية فى حادثة برده 

تخيل ابن /ابنة نازل من البيت ورايح مشوار ولا رايح الكلية عادى زى كل يوم ومايرجعش !! :( 

ربنا يرحمهم ويصبر أهاليهم وأصحابهم وكل اللى بيحبهم يارب 
ويجنبّنا ويجنّب أهالينا صدمة الموت المفاجىء ده :( 

يااااااااااااااااااااااااارب