حبة كــلام ببلاش

الجمعة، 1 ديسمبر 2017

صدّق .. تتصدّق

صدق حلمك.. يصدّقك

الخميس، 23 نوفمبر 2017

بقالى فترة طويلة ماكتبتش هنا
حاجات كتيرجدا حصلت يمكن مش هقدر امسكها اوى .. بس فيه شريط بيمر قدامى بعدد مش هين بالحاجات دى
الحاجات اللى وصلتنى للى حاساه دلوقتى
'إنى مش لاقيانى'
ياترى دى شخصيتي الحقيقية واللى قبل كدا اللى كان قشرة
ولا اللى انا فيه ده مش أنا !!
انا مش حابة شخصيتى دلوقتى .. مش حاساها انا
انا بقيت بصحى الصبح مستتقلة انى اقوم من السرير .. وهقوم ليه!!
كل حاجة بالنسبالى بقت مالهاش لزمة .. مالهاش معنى .. ومش هتفرق مع حد فى حاجة
كل حاجة بقت تقيلة
مابقتش لاقية سبب ولا هدف .. ولا نية !
كل الورق المتعلق فى اوضتى بيقول انى ماكنتش كدا
طيب وصلت لكدا ازاى ؟ وليه !
وهفضل كدا لامته ؟؟
مش ممكن هكمل حياتى كدا

اه طولت .. بس اكيد هتخلص
الفترة دى هتخلص ان شاء الله

الاثنين، 8 مايو 2017

واجعل لصباجك معني

ماذا يعني ذلك الصباح الذى تستقبله بدون ابتسامة تليق به ؟؟

كيف تريده أن يستقبلك بود وترحاب وقد تجهمت بوجهه !!

قبل أن تخرج ليومك .. استقبل صباحك بترحاب يليق به

قبل أن تخرج ..

فتش بداخلك عن ابتسامة تجعل لصباحك معني ..

تجعل ليومك معني

السبت، 29 أبريل 2017

السبت 29/4/2017

النهاردة رغم قفلة أول خبر ع الريق قررت إن اليوم مش هيقف عندها وإنه هيبقي حلو

النهاردة أول سؤال وأول جواب
أول..
مين دى ؟؟
شكلها مهتمة ,,وأنا هاجى اشرحلها بكرة

النهاردة اليوم كان حلو

يوم الخميس 27-4-2017

نزلت العمليات أحضر حالتين ولادة أو بالأصح حالتين انعاش للأطفال اللي مستنيين ولادتهم

في الفاصل بينهم لقاء الجراحين اللي لسة بيتعقموا العملياتهم

قابلت أستاذ تجميل

سنه فوق الستين أو يمكن السبعين وسألني اسمك ثم السؤال الأهم :

دفعة كام يا دكتورة ؟

-2015 يا دكتور

يااااااه ده إنتى لسة صغيرة أوي

الكلمة دى بالنسبالي كان وقعها عليا غريب جدااا

اتبسطت بيها أوي رغم كوني ((الصغنن )) من أول مادخلت الكلية بين أصحابي

بس حسيت بطعم تاني خالص للكلمة دى

حسيت إني فعلا لسة صغيرة أوي جنب الدكاترة اللي أصغر واحد فيهم أكبر مني بمرتين تلاتة

وإن قدامي لسة طريق طوييييييل

لسة ببدأ طريقي ,, لسة بحبي في الطب

أو يمكن بقيت أنا الطفلة اللي لسة بتتولد وبيعلموها ازاى تاخد أول نفس عشان تعيش

"الصغنن"

السبت، 22 أبريل 2017

أول يوم عيال

حاسة إن هيمر عليا أيام كتير هعتبرها ((أول يوم عيال ))

بس دى حاجة حلوة فى كل الأحوال

بالليل سألت أصحابي "إنتو إيه اللي بيخليكوا تصحوا كل يوم الصبح تنزلوا الشغل ؟"

الإجابة الوحيدة اللي ليها معنى كانت " عشان أتعلم حتى لو مش مؤثرة أوي في المكان اللي فيه دلوقتي و اللي بعمله ممكن أي حد غيرى يعمله بس بعد شوية هتميز .. وهبقي بصحي للحاجة اللي مش هتمشي إلا بيا "

وده كان الختام قبل النوم

صحيت الصبح بدرى وفعلا مش فاكرة هل قعدت أفكر زى كل يوم شغل "هقوم ليه ولا لأ "

نزلت وأنا ناوية أستفيد أيا كان الوضع , أياً كان اللي موجود وبدعي ربنا يثبتني ويهديني

لقيت النهارة الحضانة full , مرور مرتين مرة مع النايب ومرة مع الأخصائي

الناس كويسة والوضع العام مريح غير ماكنت متخيلة وغير إحساسي في أماكن تانية

وضع الحضانة كدا ووجود الحالات والشيتات وان اليوم مش فاضي وإن تقريبا طول ما انا هناك الكل شغال

أكدلي إنى بحب الشغل .. بحب أعمل حاجة ليها قيمة

مش عاوزة مكتب ومكان مريح مافيهوش شغل وأفضل أعد الساعات اللي قاعداها لحد ما امشي وخلاص

أنا عاوزة أعمل حاجة .. وحاجة تعمل فرق مش سد خانة وخلاص

النيونيت حاساه تخصص شبهي ومناسب ليا من نواحي كتييير

أول يوم عيال .. إحساس أتمني يتكرر كل يوم ومع كل حالة بشوفها

كل مولود جديد يبقي بداية جديد

بكرة هتم 25 سنة في الحكومة ..

ومبسوطة " لأنى إهتديت "

الاثنين، 17 أبريل 2017

لست بهذا السوء

لسبب ما فقدت جميع صورى منذ دخولي الجامعة

جميع ذكرياتي خلال 7 سنوات

ولسبب ما آخر عادت دون ترتيب .. عادت مبعثرة وعشوائية دون ترتيب زمني أو مكاني

ورغم ذلك .. وجدت بهذه العشوائية بهجة مختلفة

بهجة عدم معرفة ما هى الصورة التالية .. عدم العنونة والزمنية والمكانية مبهجة

عرض الصور بصورة عشوائية مبهج

عرض صورة منذ أيام وتليها صورة منذ أعوام جعلني أدرك شىء هام

أدركت أنني لست بهذا السوء الذي تخيلت أنني انحدرت له عام بعد عام

ربما أدركت الكثير من الأشياء فى هذا العالم أفقدتني الرؤية فارتدريت عدسة ولكنها سوداء

أظهرتلي الأمور كافة بلون يميل إلي السواد

فتحول العالم من الأبيض المليء بالأمل والعفوية والبهجة لعالم مظلم لايقبل المحاولة لإصلاحه

وحدث ذلك بشكل سريع ومفاجىء

فانطفأت .. أو هكذا تخيلت !

عندما تصفحت نفسي من خلال الصور خلال هذه الفترة التي شهدت التحول وماسبقها وماتلاها ..

أدركت أني ظلمت نفسي ونظرت إليها بنفس العدسة السوداء

مازلت "أنا"

ولكن لابد أن أتخلى عن هذه العدسة .. لابد أن أحطمها

السبت، 15 أبريل 2017

15/3/2017

تمام عامي الخامس والعشرين (( ربع قرن ))

لم أتمه رسمياً ولكني أتممته واقعياً

هل أتممته حقاً ؟؟

أحداث اليوم تنفى ذلك

تنفي الـ (ربع قرن) ,, وشهادة البكالوريوس ,, ولقب دكتوررة الذى يعطيني فوق وقارى وقار وفوق عمرى عمر

اليوم كنت الصغيرة جدااااا

بنفس الجنون والانطلاق والبراءة أو أكثر

بدايات كثيرة وأحلام وعهود طُبعت دون حبر أو نطق

يوم من عمرى

يوم ميلادي

الأربعاء، 12 أبريل 2017

عندى نوتة ممكن اسميها نوتة "الضمير" أو نوتة "الليل وآخره"

كل فترة أو يمكن كل يوم كسلان بالليل .. وبعد شوية تفكير بيوصل لزعل بيوصلني للنوتة وقلم

أفتحها عشان أفكر .. أو أزعق .. أو أخطط

ولما أفتحها ألاقي خطط كتير .. خطط وتواريخ

حطط كتير في أيام زى اللي اللي فيها بالظبط

خطط تضايق لأنها شبه اللي هكتبه بس بتاريخ جديد وحبر جديد

هي مش كلها خطط ما اتنفذتش

فيه منها اتنفذ .. ويمكن حاجات كتير ومهمة بالنسبالي

بس دايما بزعل ع اللي ما اتنفذش ومابحسش بقيمة للي نفذته

مش جلد للذات

بس يمكن بحسها قليلة أوي وخلاص خدت وقتها

ما علينا ...

من شوية بفتح النوتة دى عشان أكتب فيها

حسيت انى بقطع منها ورق كتير بس جه في ددماغي حاجة تانية غير كل مرة

افتكرت أكتر ورق قطعته طول حياتي .. جداول المذاكرة

خاصة أيام الامتحانات .. كل يومين جدول جديد وتقطيع القديم

ورغم كل الورق اللى قطعته وكل الجداول والخطط اللي باظت .. نجحت وبقيت "حاصلة علي بكالوريوس الطب والجراحة "

فطلع إن وسط الورق الكتير اللي بيتقطع

فيه حبة ورق بيشقوا طريقهم وبيكملوا

يارب يزيده

الثلاثاء، 11 أبريل 2017

حلم مرعب

زى ماجيت زى مامشيت

ماسيبتش حاجة وماعملتش حاجة !!

حلم مرعب بجد

كنتي فين طول حياتك ؟؟ كنت نايمة !